DILI, 09 outubru 2022 (TATOLI)– Embaixadór Repúblika Demokratika Saharawi iha Timor- Leste, Boibat Malainin, kuarta ne’e hasoru malu ho Prezidente Repúblika, José Ramos Horta, hodi hato’o agradesementu ba apoia Estadu Timor-Leste ba autodeterminasaun povu Sahara Osidentál.
“Iha enkontru ne’e, Ha’u hato’o ba Prezidente Repúblika kona-ba luta povu Sahara Osidental liuliu nia espresaun ba ukun rasik aan hodi hetan soberania totál ba terrióriu Sahara Osidentál”, dehan nia iha Pálasiu Presidensiál, Bairru-Pité, kuarta ne’e.
Notísia relevante:Prezidente Repúblika Apoia Direitu Auto-Determinasaun Povu Sahara Osidentál
Nune’e, Embaixadór ne’e lori povu Sahara nia naran agradese ba povu no Estadu Timor – Leste ne’ebé apoiu maka’as tebes ba auto-determinasaun ka independénsia povu Sahara nian.
“Hau informa ba Prezidente Repúblika kona-ba agradesimentu hosi Governu no povu Sahara Osidental ba kompromisiu hosi Prezidente Repúblika, Governu, Parlamentu Nasionál, Partidu politiku, sosiedade sivil no povu Timor-Leste ne’ebé fó apoiu maka’as hodi defende direitu auto-determinasaun povu Sahara Osidentál nian atu reklama soberania totál ba territóriu Sahara Osidental”.
Timor – Leste iha konsensu nasionál ne’ebé fó apoiu maka’as ba auto-determinasaun no independénsia totál povu Sahara Osidental
Tanba Povu Sahara Osidentál ninian luta ba auto-determinasaun durante tinan 19 ona tanba Maroko mak viola Cesar fogu.
Enkuantu, Sahara Osidentál nu’udár territóriu ne’ebe disputa iha nordeste tasi Áfrika nian no seidauk indepedente. Sahara baliza ho Arjélia nordeste, ho Maroko parte norte no Mauritánia Leste no Súl.
Sidade Sahara Osidentál lokaliza iha El Aaiún ho luan 266.00 kilometru kuadradu iha kontinente Áfrika, ne’ebé uza moeda Dirham Maroko no uza língua ofisiál Árabe.
Notísia relevante:Boibait Malainin informa progresu autodeterminasaun povu Sarauí ba PPN
Jornalista: Hortencio Sanchez
Editór : Florencio Miranda Ximenes
