iklan

JUSTISA, HEADLINE

Lugu presta deklarasaun iha CAC nu’udar sasin ba kazu balun iha RAEOA

Lugu presta deklarasaun iha CAC nu’udar sasin ba kazu balun iha RAEOA

Eis Prezidente Autoridade Rejiaun Administrativa Espesiál Oé-Cusse no Ambeno (RAEOA) José Luis Guterres “Lugu”.Imajen/Natalino Costa

DILI, 11 novembru 2022 (TATOLI)— Eis Prezidente Autoridade Rejiaun Administrativa Espesiál Oé-Cusse no Ambeno (RAEOA), José Luis Guterres “Lugu”, iha sesta (11/11) ne’e, tuku 10:15, dader,  to’o iha edifísiu Komisaun Anti Korrupsaun (CAC) hodi presta deklarasaun nu’udar sasin ba kazu projetu sira ne’ebé akontese iha RAEOA-Zona Espesiál Ekonómiku Merkadu Sosiál (ZEEMS).

Eis PA RAEOA ne’e to’o iha edifisiu CAC ho karreta privadu, marka pajero ho xapa matríkula 27-925 TL, molok presta deklarasaun prenxe uluk lista vizita iha portaun seguransa.

Hafoin hato’o deklarasaun ba investigadór CAC, José Luis Guterres ba jornalista sira hateten, nia prezensa iha CAC tanba simu konvokatóriu hosi investigadór CAC atu sai sasin ka testamuña ba kazu  projetu sira ne’ebé durante ne’e la’o iha RAEOA.

“Ha’u hanesan sidadaun Timór, ha’u simu konvokatóriu ida hosi CAC atu mai sai hanesan testamuña  ba atividade projetu ka buat sira ne’ebé maka iha rai Oé-cusse. Tanba uluk ha’u hanesan Prezidente Autoridade RAEOA”, katak eis Prezidente Autoridade iha edifisiu CAC, sesta ne’e.

Ba prenzensa ne’e, nia dehan dala rua ona hato’o deklarasaun ba CAC tanba hanesan sidadaun ida hakarak koopera ho parte hotu iha área justisa.

“Ha’u hanesan sidadaun ha’u, hanesan veteranu ba prosesu libertasaun nasionál hakarak koopera ho justisa  hodi hatudu ba jerasaun foun  no povu katak, justisa  ne’e la’ós ba povu k’ik, maibé ba ema hotu”, katak Lugu

Maibé,eis Prezidente Autoridade ne’e la esplika detallu kona-ba kazu projetu sira tanba prosesu hotu sei iha investigasaun nia laran.

Kona-ba kestaun Ró Haksolok, nia dehan uluk nia sei assume kargu PA RAEOA kestaun Ró Haksolok iha ona relatóriu hosi tribunál de kontas.

“Ida ne’e, ha’u lakohi hanesan detalla tanba buat sira ne’e hotu husik ba aban bain-rua imi bele hatene. Maibé atu hateten mós ba imi katak relatóriu hosi tribunál kontas ne’e sai tiha ona buat iha ne’eba imi le’e hotu, imi akompaña hotu, nune’e ha’u mai  atu  responde ba projetu bo’ot ne’ebe maka la’o iha Oé-cusse,”  Nia afirma.

Biban ne’e, Eis Vise Primeiru Ministru ne’e mós hasoru malu ho Komisáriu KAK Sergio Hornai hodi deseja institusaun KAK ne’ebé durante ne’e halo nian serbisu ho di’ak

“Agradese ba imi nian serbisu, halo imi nian serbisu ba rai ida ne’e no kontinua respeita lei, konstituisaun no respeita ema hotu”, Lugu enkoraja.

Jornalista: Natalino Costa

Editór       : Florencio Miranda Ximenes

iklan
iklan

Leave a Reply

iklan
error: Content is protected !!