DILI,11 novembru 2022 (TATOLI)— Komandante Polísia Nasionál Timor-Leste (PNTL) Munisipiu Dili, Superintendente Xefe Henrique da Costa, informa operasaun konjunta ne’ebé halo hosi Komandu PNTL Munisípiu Dili no hetan apoiu hosi Unidade Polísia Marítima (UPM), iha kinta (10/11), tuku 20:00, kalan, konsege detein suspeitu ida ne’ebé lori arma branka iha área Marabia, suku Lahane Orientál.
“Ita nian ekipa Nain-Feto nian hala’o hela operasaun no pasa revista iha área Marabia nian nota katak joven ida lori sasan kro’at hanesan fiska no fatuk halo movimentu iha área ne’ebá, entaun ita nia parte patrolla no detein joven ne’e ho evidénsia sira hodi lori kedan bá Eskudra Nain-Feto atu prosesa,” katak Komandante ne’e ba jornalista sira iha salaun Institutu Nasionál Administrasaun Públiku (INAP),Comoro-Dili, sesta ne’e.
Superintendente Xefe Henrique da Costa, hateten suspeitu ekipa operasaun detein tanba deskonfia hala’o movimentu iha tempu kalan ho arma branka atu halo provokasaun.
“Ita bele deskonfia katak suspeitu ne’e halo tiha provokasaun ka nia tiru no tuda tiha ema iha fatin seluk maka mai fali, nune’e ita asegura kedan no lori maiu iha Ekuadra Polísia Nain-Feto”, katak.
Daudaun ne’e, nia informa suspeitu ne’e asegura hela iha Eskudra polísia Nain-Feto hodi submete ba prosesu investigasaun.
“Ita nian investigádór Nain- Feto kontaktu ona Prokuradór atu nune’e hetan orientasaun hodi halo prosesu kontinuasaun ba suspeitu ne’e”, katak.
Nune’e, Komandante ne’e dehan ekipa konjunta sei kontinua hala’o operasaun iha tempu kalan, nune’e garante seguransa iha sidade Dili hodi sidadaun sira bele la’o livre no seguru iha tempu kalan.
Jornalista: Natalino Costa
Editór : Florencio Miranda Ximenes
