VIQUEQUE, 14 novembru 2022 (TATOLI)—Administrasaun Ministériu Viqueque, segunda ne’e, hahú realiza jogu futeból iha ámbitu komemora loron proklamasaun independénsia ba dala-47 (28 novembru 1975).
Tuir Administradór munisípiu Viqueque, Januário Soares ‘Bolly’, inisiativa realiza jogu desportiva ba funsionáriu Administrasaun Viqueque sira hodi hametin unidade, amigável no anima komunidade.
“Ita ohin halo abertura jogu futeból ida-ne’e hodi komemora loron proklamasaun independénsia 28 novembru hodi hametin pás no amigável iha munisípiu Viqueque,” Administradór munisípiu Viqueque, hateten, liuhosi ninia diskursu abertura jogu futeból, iha kampu demokrasia, iha postu Viqueque Vila.
Abertura jogu ne’e hosi klubu Eletricidade de Timor Leste, Empreza Públiku (EDTL, E.P) hasoru Administrasaun munisípiu Viqueque A.
Atividade desportiva ne’e hahú iha loron 14 no sei ramata iha 26 novembru 2022.
Notísia relevante: Preparasaun loron proklamasaun independénsia iha Manatuto atinje 60%
Nune’e, nia husu jogadór sira tenke joga ho di’ak hodi nune’e hetan apresiasaun pozitivu hosi komunidade lokál.
Iha fatin hanesan, Prezidente Komisaun Organizadora ba komemorasaun loron 28 novembru munisípiu Viqueque, Lozinho Martins, haktuir, komemorasaun loron istóriku ne’e ho atividade oin-oin hodi anima komunidade.
“Ita hakarak serimónia komemorasaun tenke hetan partisipasaun másimu hosi komunidade. Atividade la’ós atividade desportu de’it, maibé atividade seluk hanesan sa’e bua, ne’ebé daudaun ne’e komisaun organizadora sira prepara hela,” nia hato’o.
Administrasaun munisípiu Viqueque aloka orsamentu ba atividade desportiva hamutuk $1.000, kompostu hosi insentivu ba arbitrajen $300, sosa bola, aloka ba manán-na’in primeiru lugár $200, segundu lugár $150, terseiru lugár $100, ne’ebé kada grupu manán-na’in sei hetan tan farda ida inklui prémiu.
Klube hamutuk 10 hosi instituisaun Estadu iha Viqueque partisipa iha jogu futeból komemora loron proklamasaun, ne’ebé asiste hosi autoridade no komunidade lokál.
Jornalista : Vitorino Lopes da Costa
Editora : Julia Chatarina
