DILI, 14 novembru 2022 (TATOLI)–Autoridade Inspesaun no Fiskalizasaun Atividade Ekonómika, Sanitária no Alimentár, Institutu Públiku (AIFAESA, I.P) identifika estabelesimentu komersiál hamutuk 39 komete infrasaun fa’an tabaku ilegál.
“Iha tinan 2022, to’o fulan-novembru ne’e, AIFAESA identifika estabelesimentu komersiál 260 mak kontra infrasaun hanesan komersializa produtu liu prazu no balun halo atividade ho autorizasaun komersiál la loos. Estabelesimentu 39 Komete infrasaun fa’an tabaku ilísitu 39,” Xefe Devizaun Operasaun AIFAESA, I.P, Armindo Gonçalves, hateten ba Agência Tatoli, iha ninia knaar fatin, Matadouro, segunda ne’e.
Notísia relevante: Governu hasa’e impostu ba tabaku $100 kada kilograma
Kona-ba tabaku ilísitu, hanesan tabaku ne’ebé ninia modelu rotulajen la tuir regra, hatúr iha dekretu-lei, tanba AIFAESA mós iha kompeténsia atu halo kontrola ba tabaku ilísitu bazeia ba dekretu-lei númeru 14/2016, ne’ebé atribui kompeténsia liuhosi despaisu Primeiru-Ministru númeru 79/2017/juñu/PM.
Estabelesimentu sira ne’ebé komete infrasaun hanesan, balun halo hela atividade maibé laiha autorizasaun komersiál, balun halo atividade maibé autorizasaun hosi Servisu Verifikasaun Emprezariál, Institutu Públiku, Institutu Públiku (SERVE, I.P) inválidu ona no balun enderesu la loos.
Tabaku sira ne’ebé ekipa halo apreensaun kompostu hosi tabaku slop 166, masu 640, lulun 194, plástiku 1.689, ne’ebé hafoin halo apreensaun, ekipa halo destruisaun, normalmente kada tinan dala-rua.
Aleinde ne’e, estabelesimentu sira ne’ebé komete infrasaun sei aplika koima depende ba ninia gravidade.
Jornalista : Antónia Gusmão
Editora : Julia Chatarina
