DILI, 15 novembru 2022 (TATOLI)— Komandu Polísia Nasionál Timor-Leste (PNTL), munisípiu Dili, liuhosi ekipa konjunta Unidade Espesiál Polísia (UEP), Batallaun Ordem Públika (BOP), konsege detein manifestante hosi Aliansa Maubere Nasionál (AMN) na’in-39 tanba viola lei asaun pasífiku.
Aliansa Maubere Nasionál (AMN), kompostu hosi estudante universtáriu sira ne’ebé eziste iha kapitál Dili halo asaun pasífiku hasoru Parlamentu Nasionál (PN), hodi kontra planu sosa kareta prado sport no laptop ba Deputadu sira.
Notísia relevante: Asaun pasífiku hasoru PN, PNTL husu AMN respeita lei manifestasaun
Komandante Polísia Munisipiu Dili, Superintendente Xefe Herique da Costa, informa katak ekipa konjunta asegura ka detein manifestante na’in-39 tanba lei númeru 1/2006, kona-ba demostrasaun nian ne’ebé bandu atu manifestante hala’o asaun pasífiku iha fatin ne’ebé konsidera importante no asaun pasifíku tenke dook hosi edifísiu públiku ho medida metro 100.
Ekipa konjunta halo detensaun iha loron segunda (14/11), tuku 11:00, dader, bainhira manifestente sira tuda fera vidru iha kampu Universidade Nasionál Timor-Leste (UNTL) no hakat liu fatin demostrasaun hodi hala’o manifestasaun iha resintu Parlametu Nasionál nia-oin.
“Horisehik, ita nian manifestante sira utrapasa tiha fatin manifestasaun no sira mai liu tiha Estrada klaran iha kedan Parlamentu Nasional nia oin, nune’e ita aviza ba ita manifestante sira dala tolu atu sira husik fatin, maibé sira la kopera. Tanba ne’e, PNTL halo atuasaun ba manifestante sira ne’e hodi lori mai detein iha komandu Dili hodi prosesa tuir lei”, hatete Komandante ne’e iha Caicoli-Dili, tersa ne’e.
Nia esplika, ekipa konjunta detein manifestante nain-39, maibé haruka manifestante na’in-13 mak fila ba uma tanba ema ho difisiénsia matan no konsidera sira la hatene buat ida.
Nune’e, Komandu Munisipiu Dili detein hela manifestante nain-26 iha sela detensaun Caicoli hodi kontinua prosesa tuir lei.
“Ita asegura hela ema nain-26, daudaun ne’e ita haruka hela sira nian auto notísia ba Ministériu Públiku (MP), hodi hein orientasaun tuir ma”, katak.
Daudaun ne’e, Komandu munisípiu Dili liuhosi investigadór sira kontinua investiga vidru UNTL nia ne’ebé hetan estragu.
Tanba ne’e, tuir nia atuasaun ne’ebé PNTL halo viola direitu umanu, maibé uza maneira aproximasaun ho manifestante sira koalia didi’ak ho sira nune’e sira koopera tula sira ba karreta lori ba Komandu PNTL Dili hodi prosesu.
“Ita husu ba iha alin estudante, ita bo’ot sira nia direitu ka sidadaun hotu, iha direitu hodi halo manifestasaun ka hodi hato’o sira opiniaun ka hato’o sira nia hanoin ruma, maibé tenke tuir lei, kuandu la koopera PNTL sei atua tuir lei ne’ebé iha”, nia sujere.
Notísia relevante: AMN konvida veteranu hamutuk iha asaun pasífiku kontra desizaun PN
Jornalista: Natalino Costa
Editór : Florencio Miranda Ximenes
