iklan

NASIONÁL, POLÍTIKA

Estudu viabilidade ba konstrusaun Muzeu Nasionál tama ona faze finál

Estudu viabilidade ba konstrusaun Muzeu Nasionál tama ona faze finál

Diretór Jerál Arte no Kultura, Manuel Ximenes Smith. Imajen TATOLI/Egas Cristóvão.

DILI, 16 novembru 2022(TATOLI)—Diretór Jerál Sekretáriu Estadu Arte no Kultura (SEAK), Manuel Smith, informa prosesu estudu viabilidade ba konstrusaun Muzeu Nasionál tama ona iha faze finál.

”Muzeu nasionál nia estudu viabilidade hotu ona, ne’ebé nia fatin iha Aitarak Laran Palásiu Prezidente Repúblika nia sorin,” Manuel Smith hateten ba Agênsia Tatoli iha nia kna’ar fatin Avenida Portugál, Dili, kuarta ne’e.

Kompozisaun iha fatin ne’e mai-hosi instituisaun tolu (3) hanesan Ekipa Institutu Petróleu no Jeolojia (IPG, sigla portugés), Muzeu Nasionál no mós Futuru NATCOM ba fatin ida-ne’ebé fahe ba fatin tolu.

“Entaun, ita halo ona diskusaun iha Fundu Infraestrutura no semana kotuk kolega sira ba reuniaun iha Komisaun Nasionál Aprozionamentu (CNA, siglá-portugés) para haree nia prosesu ne’e tomak atu ita-nia ezijénsia hosi Instituisaun tolu (3), IPG, Sekretáriu Estadu Arte no Kultura no mós UNESCO ne’ebé hakarak CNA atu bele konsidera ita-nia termu referénsia ne’ebé ita hato’o no mós tempu ne’ebé ita hatama tiha ona ba sira, atu nune’e labele halo mudansa no kontinua nafatin ho ita-nia termu referénsia, tanba iha momentu ne’e ADN fó ona aprovasaun ba ita-nia estudu viabilidade,” nia esplika.

Estabelesimentu Muzeu Nasionál ne’e iha objetivu ne’ebé signifikásia tebes ba povu ida-ne’ebé hamriik ona no nu’udar sidadaun ne’ebé moris iha nasaun ida, tanba reprezenta identidade kulturál suku hotu iha nasaun laran.

“Ita hatene katak, nasaun iha mundu hotu ema fó prioridade boot ba muzeu, tanba muzeu kuandu ema ruma atu mai vizita ita Timor, ema la presiza ba to’o munisípiu no ema la presiza tama to’o iha suku sira, maibé ema ba iha muzeu haree kona-ba objetu muzeu no informasaun ne’ebé iha muzeu hatudu ne’e ema komprende ona kona-ba karáter, ema komprende ona kona-ba kultura ema timor-nian no ema komprende oinsá mak nia tama iha komunidade ida-nia leet no nia halo prosesu adoptasaun ho ema-ne’e rasik,” nia dehan.

Entaun, muzeu fatin ne’ebé atu fó sensibilizasaun ba ema estranjéiru sira atu bele komprende no adota prosesu kulturálmente, naturálmente k karáteristika ema rai ida-nian, tanba ne’e bainhira ko’alia enjerál muzeu ne’e fatin atu rai no kuidadu objetu kulturál ka elementu oioin kulturál nian, ne’ebé mai hosi etnográfiku, arkeolójia, istóriku no buat barak ne’ebé mak impoin iha muzeu.

Kona-ba orsamentu ba konstrusaun muzeu nasionál, daudaun sei diskute hela iha Komisaun Nasionál Aprovezionamentu (CNA, siglá-portugés).

“Tuir iha livru 2 ba iha Fundu Infraestrutura ba prosesu konstrusaun biblioteka ne’e, ita iha 2.1 la sala ida-ne’e atu halo prosesu konstrusaun ba muzeu nasionál, maibé momentu ne’e sei diskute hela. Tanba ne’e, ha’u dehan sei tama hela iha CNA atu haree kona-ba nia prosedimentu tékniku, liu-liu kona-ba prosesu konstrusaun ne’e rasik,” nia dehan.

Entretantu, tuir informasaun hosi Diretór Jerál ne’e hateten tuir planu Muzeu Nasionál ne’e sei harii iha Aitarak Laran iha Palásiu Prezidente nia sorin.

Jornalista : Nelia Fernandes

Editór       : Cancio Ximenes

iklan
iklan

Leave a Reply

iklan
error: Content is protected !!