DILI, 16 novembru 2022 (TATOLI)— Komandu Polísia Nasionál Timor-Leste (PNTL), munisípiu Dili liuhosi Departementu Tránzitu, tersa kalan, hala’o operasaun konjunta no konsege halo apreensaun ba motór hamutuk 16 ne’ebé viola kódigu estrada.
“Operasaun horikalan liuhosi ekipa konjunta konesege halo apreensaun ba motorizada hamutuk 16 ne’ebé viola kódigu estrada”, hatete Komandante Polisia Nasionál Timor-Leste (PNTL), Munisípiu Dili, Superintendente Xefe Henrique da Costa, ba jornalista sira iha Caicoli, kuarta ne’e.
Ekipa konjunta halo apreensaun ba motór hirak ne’e tanba komete infrasaun hanesan laiha dokumentu karta kodusaun, dokumentu mate no balun espellu laiha, laiha xapa matríkula no uza kanu-resin.
“Ita aplika multa ba sira liuhosi fó billete ba ita nia infratór atu ba selu tiha iha banku maka bele mai foti sira nia motór”, nia esplika.
Atu prevene asidente tráfegu no garante seguransa, nia dehan komandu PNTL Dili sei kontinua halo operasaun hodi garante seguransa ba komunidade sira bele la’o livre inklui iha tempu kalan.
Jornalista: Natalino Costa
Editór : Florencio Miranda Ximenes
