Top

MP alega pena suspensaun ba arguidu kondús motór tama rezidénsia eis-PR Lu-Olo

Logotipu TDD. Imajen Tatoli/Egas Cristóvão.

DILI, 17 novembru 2022 (TATOLI)— Tribunál Distritál Dili (TDD), kinta (17/11), halo julgamentu ba arguidu LS, ne’ebé kondus motór halai tama eis-Prezidente Repúblika Francisco Guterres Lú-Olo, iha tinan 2020.

Iha sala julgamentu, Ministériu Públiku ne’ebé reprezenta hosi Prokuradór Renato Bere Nahak, aprezenta akuzasaun katak, kazu ne’e akontese, iha loron 23 janeiru 2020, tuku 04:30, madrugada, arguidu LS kondús motór ho la uza faru no kapaste, halai tama iha área rezidénsia eis-Prezidente Repúblika Lu-Olo nian iha Faról-Dili.

Arguidu konsege halai tama rezidénsia Lú-Olo, la hala’o asaun krime ruma, maibé atu soke seguransa sira. Hafoin ne’e arguidu atu halai sai fali ba estrada bo’ot, maibé polisia sira ne’ebé mak halo seguransa iha área PR nian iha Faról, konsege hapara asaun arguidu nia no husu arguidu kona-ba nia karta kondusaun, maibé arguidu laiha karta kodusaun.

Nune’e, MP akuza arguidu ba krime rua hanesan laiha karta kondusaun ne’ebé previstu iha artigu 207 no kondisaun perigoza 208 hosi kódigu Penál Timor-Leste.

Perante julgamentu, Sasin Manuel da Costa Pinto deklara katak momentu ne’ebá, nia ho kolega polísia fó seguransa iha rezidénsia PR Lú-Olo haree katak arguidu kondús duni motór tula ho nia kolega ida, tenta atu halai tama ba iha rezidénsia Prezidente Repúblika nian.

“Maibé, ha’u tenta atu hapara arguidu nia asaun ne’e, maibé nia kondús motór maka’as hodi tama liu ba laran”, deklara sasin ne’e.

Sasin ne’e deklara liu tan katak, arguidu konsege halai tama ba PR nia rezidénsia, bainhira to’o tiha iha laran arguidu haree laiha tan ona dalan atu kontinua kondús motór, entaun arguidu so’e hela motór hodi halai sai no dadeer maka foin ba foti motór.

Nune’e mós sasin Tito da Costa, mós deklara katak, momentu ne’e nia ho sasin Manuel maka fó seguransa ba iha rezidénsia Prezidente Repúblika Lu-Olo no haree duni arguidu kondús motór, maibé la hatais faru hodi tama ba iha rezidénsia refere.

Hataan kona-ba arguidu sira keta kondisaun lanu, sasin ne’e deklara laiha koinesementu, tanba dadeer maka arguidu sira foin mai foti fali motór, no sasin sira entrega kedan arguidu ba iha parte polisia investigasaun hodi submete ba prosesu investigasaun.

Hafoin akompaña deklarasaun sasin sira, Ministériu Públiku husu ba Tribunál atu aplika pena prizaun tinan-rua no fulan-neen, suspende nia ezekusaun ba tinan-tolu.

Ho akuzasaun MP ne’e, Defeza arguidu hosi Defesór Públiku, Sebastião Amado, mós aseita ho alegasaun Ministériu Públiku nian ne’ebé alega ba nia kliente.

Presiza aplika pena prizaun tinan rua fulan neen, suspende nia ezekusaun ba tinan tolu atu fó hanoin ba arguidu SL, labele komete tan krimi hanesan iha futuru.

Hafoin rona tiha parte rua nia deklasaun Tribunál adia julgamentu ba fali iha loron 16 dezembru oras 10:00, dader hodi rona desizaun ikus.

Audénsia julgamentu ne’e prezide husi Juiz singulár Alvaro Fatima, MP reprezenta husi Prokuradór Reinato Bere Nahac, arguidu hetan asisténsia legál hosi Defensór Publiku Sebastião Amado.

Jornalista: Natalino Costa

 Editór      : Florencio Miranda Ximenes

Publisidade

Leave a Reply

Latest Post

error: Content is protected !!