DILI,17 novembru 2022 (TATOLI)— Diretór Nasional Farmasia no Medikamentu iha Minsitériu Saúde (MS), Delfim Ferreira, hateten durante halo inspesaun ba importadór fármasia sira iha munisípiu Díli konsege rekolla ona xarope kontaminadu hanesan unibebi no termorex hamutuk 5.636.
“Ekipa Ministériu Saúde hala’o servisu inspesaun ida ne’e hahú iha loron 26 outubru to’o 11 novembru ba empreza importadór ka farmásia no klíniku privadu sira iha Díli 44 konsege rekolla xarope kontaminadu hanesan unibebi botol hamutuk 5.338 no iha termorex botol 298”, Diretór ne’e hateten ba Jornalista sira iha nia kan’ar fatin Caicoli, kinta ne’e.
Atividade inspesaun iha faze dahuluk hala’o iha munisípiu Dili no faze daruak daudaun ne’e hahú ona iha munisípiu Baucau, Viqueque, Lautem no Manatuto
“Ami simu ordem servisu ba faze daruak nian ami nia ekipa kontinua la’o ona ba munisípiu sira iha parte leste ne’ebé ami sei relata dadus ne’e ba tempu tuir mai,” Nia afirma.
Nia relata relatóriu temporariu katak distribuisaun venda xarope existe iha farmásia no klínika privadu sira iha munisípiu , nune’e Ministériu Saúde deskonfia katak to’o mós iha postu administrativu sira.
“Finalidade mak xarope unibebei sirup ne’e ita sei halo destroisaun totál iha tempu badak nia laran, no ida termorex ita sei halo identifikasaun ida halo teste tan hodi justifika kontamina ka lae, maibé iha ( Badan Pengawas Obat dan Makanan-BPOM) identifika iha balun sira devolve fali, maibé ita timor seidauk iha laboratóriu entaun ita hein prosesu balun ita sei adia tan pasu tuir mai signifika ita sei ba halo teste tan iha Austrália ou Tailándia para hatene nia kualidade loloos,”Nia informa.
Tanba ne’e, Ministériu Saúde apela ba komunidade sira bainhira oan ka família ruma moras presiza hakbesik bá fasiliddae saúde ne’ebé besik, nune’e médiku sira halo diagnostiku ne’ebé mak d’iak.
Jornalista : Felicidade Ximenes
Editór : Florencio Miranda Ximenes
