iklan

JUSTISA, HEADLINE

Faktu la sufisiente, TDD aplika TIR ba manifestante na’in-11

Faktu la sufisiente, TDD aplika TIR ba manifestante na’in-11

TDD liuhosi despaisu ikus iha Interrogatóriu dahuluk aplika medida koasaun Termu Identidade Rezidénsia (TIR) ba manifestante na’in-11 hosi Aliansa Maubere Nasionál (AMN). Imajen/ Natalino Costa.

DILI, 18 novembru 2022 (TATOLI)— Tribunál Distritál Díli (TDD), sesta (18/11) ne’e, liuhosi despaisu Juiz Titulár Alvaro Maria Freitas, aplika medida koasaun Termu Identidade Rezidénsia (TIR), ba manifestante na’in-11 hosi Aliansa Maubere Nasionál (AMN).

Iha audénsia interrogatóriu dahuluk, Ministériu Públiku ne’ebé reprezenta hosi Prokuradora Ivonia promove arguidu sira ho krime tolu hanesan obstrusaun ba autoridade públika, krime dezobedénsia no danu agravadu.Nune’e, iha alegasaun MP solisita ba Tribunál atu aplika medida koasaun Aprezentasaun Periodika (AP) ba arguidu sira.

Maibe, Advogadu Privadu, Aquino Dias da Silva husu ba tribunal atu aplika medida koasaun Termu Identidade Rezidénsia (TIR) tanba nia kliente maioria sira estudante hotu.

“Iha prosesu Primeiru Interrogatóriu ne’e kuaze MP la fundamenta krime ne’ebé nia promove no laiha faktu, tanba ne’e tribunál aplika TIR.  Tanba bazeia ba deklarasaun hosi arguidu sira hatudu katak laiha indísiu forte atu dudu tribunál atu aplika krime tolu ne’e”, hateten Advogadu Privadu ne’e ba jornalista sira iha TDD, Mandarin-Dili, sesta ne’e.

Audénsia ne’e prezide husi Juiz Titulár Alvaro Maria Freitas, MP reprezenta hosi Prokuradora Ivonia no arguidu sira hetan asisténsia legál hosi Advogadu Privadu Aquino Dias da Silva.

Molok ne’e, PNTL hala’o detensaun ba manifestante hosi AMN, iha loron kuarta (16/11), no kumpre ona detensaun oras 72, tanba deskonfia la kumpre regra manifestasaun nian ne’ebé previstu iha lei demostrasaun númeru 5/2006, kona-ba halo manifestasaun tenke dook ho metro 100 hosi edifisiu públiku.

Manifestante hosi AMN ne’e halo demostrasaun hasoru planu Parlamentu Nasional atu halo akizasaun ba karreta prado sport no laptop, maske Deputadu sira iha PN deside altera hodi la sosa.

Jornalista: Natalino Costa

Editór      : Florencio Miranda Ximenes

iklan
iklan

Leave a Reply

iklan
error: Content is protected !!