Top

Governu propoin ba PR fó indultu ba dadur na’in-40

Ministru Justisa, Tiago Amarál Sarmento, akompaña hosi funsionáriu Ministériu Justisa hala'o konferensia imprensa kona-ba prosesu atribuisaun sertifikadu nain ba rai ne'ebé sei hala'o iha loron 28 Novembru tinan 2022, iha salaun Ministériu Justisa, sesta (18/11). Imajen Tatoli/Francisco Sony

DILI, 18 novembru 2022 (TATOLI)— Governu liuhusi Ministériu Justisa (MJ) submete ona lista naran prizioneiru na’in-40 ba Prezidente Repúblika (PR), José Ramos Horta, atubele hetan indultu iha loron proklamasaun independénsia, 28 novembru, tinan ne’e.

Proposta ne’e ho baze ba konstume iha kada selebrasaun loron nasionál sira hanesan loron nasionál ba restaurasaun independénsia (20 maiu) no loron Proklamasaun independénsia (28 novembru), Prezidente Repúblika ho nia podér konstitusionál fó indultu no komutasaun pena ba prizioneiru sira bazea ba proposta indultu hosi Governu liuliu Ministériu Justisa.

Tuir lei númeru 5/2016, 25 maiu, artigu 7 alínea d hateten, Ministru Justisa hato’o de’it prosesu pedidu indultu, bele mai hosi dadur, família, defeza ka kestaun ho kondisaun moras, maibe kompeténsia atu deside mai hosi Xefe Estadu, bazea ba konstituisaun artigu 85, númeru 1 hateten Prezidente Repúblika de’it mak bele fó indultu ka hamenus kastigu, hafoin rona Governu.

“Ami haruka ona lista sira ne’e ba Gabinete Prezidensia Repúblika, no tuir lei Prezidente Repúblika mak sei uza nia kompeténsia rasik hodi  hili prizoneiru sira ne’ebé mak atu hetan indultu no komutasaun pena, ida ne’e ita hotu labele hatene, só Prezidente Repúblika mak bele hatene”, Ministru Justisa, Tiago Amaral Sarmento, hateten ba jornalista sira iha liuhosi konferénsia imprensa  iha edifisiu Colmera, sesta ne’e.

MJ hala’o servisu no koordenasaun hela ho entidade servisu prizionál ne’ebé akumula ona lista naran prizioneiru sira nian na’in-40, kompostu hosi mane na’in-38 no feto na’in-rua.

Lista naran hirak ne’e, MJ simu mós balun nu’udar pedidu husi família kondenadu na’in-10 ne’ebé dadur iha prizaun Becora hakarak hetan komutasaun pena iha tinan ne’e hosi Prezidente Repúblika no sidadaun estranjeiru ida ne’ebé mak dadur iha Becora ne’ebé nia Embaixada iha Timor hato’o pedidu ba Xefe Estadu atu fó indultu iha tinan ne’e.

Alende ne’e, Diretór Prizaun Becora propoin lista na’in hitu, Diretór Prizaun Gleno propoin mós prizioneiru 13 no Diretór Prizaun Suai propoin kondenadu ida.

“Dadur sira ne’ebé mak sei hetan indultu ka komutasaun pena hosi Prezidente Repúblika maioria kondenadu ka envolve iha kazu omísidiu, violasaun seksuál, arma branka, ofensas integridade fíziku no  seluk tan,” Governante ne’e akresenta.

Governante ne’e husu  ba prizioneiru hirak ne’ebé maka naran la tama iha lista indultu tinan ne’e, sei iha oportunidade atu hetan indultu  hosi  Xefe Estadu iha tinan oin.

Jornalista: Natalino Costa

 Editór     : Florencio Miranda Ximenes

Publisidade

Leave a Reply

Latest Post

error: Content is protected !!