DILI, 22 novembru 2022 (TATOLI) ––Prezidente Kooperativa Kafé Timor (CCT, sigla portugés), Mário Soares, hateten, kooperativa konsege halo reabilitasaun plantasaun kafé ektare 600 iha munisípu Aileu, Ainaro, Ermera, Liquiçá no Manufahi, tinan ne’e.
“Inisiativa ne’e ho objetivu hodi hasa’e produsaun kafé, bazeia ba akordu ne’ebé Governu no CCT halo hodi reabilitasaun plantasaun kafé,” Prezidente CCT informa ba Agência Tatoli, iha Lecidere, tersa ne’e.
Tuir Mário Soares, atividade ne’e hala’o hotu ona iha munisípiu sira no agora ekipa kooperativa aprezenta rezultadu ba Governu hodi verifika kualidade no prosesu reabilitasaun kafé.
Notísia relevante: Governu aprova programa estimula renovasaun no espansaun plantasaun kafé
Nia dehan, CCT halo reabilitasaun planta kafé ba kada munisípiu ektare 100, maibé ba munisípiu Ermera rasik ektare 200 tanba munisípiu ne’e iha poténsia boot ba produsaun kafé.
Aleinde ne’e, kada agrikultór haree ba plantasaun kafé ektare hodi halo melloramentu ba produsaun no garante kualidade kafé.
“Kafé nu’udar produtu ne’ebé halo exportasaun boot liu, ho ida-ne’e importante tebes halo reabilitasaun tanba agrikultór sira hakarak sira-nia plantasaun kafé tenke halo reabilitasaun maibé nia prosesu la posível bainhira ai-horis sira ne’e hahú funan,” nia akresneta.
Programa ne’e finansia hosi Ministériu Agrikultura no Peska (MAP) no implementa hosi CCT, ne’ebé kada ektare ida aloka osan $340.
“Governu sei halo tranferénsia osan ba agrikultór sira bainhira prosesu verifikasaun hotu ona,” nia tenik.
Jornalista : Arminda Fonseca
Editora : Julia Chatarina
