iklan

JUSTISA, HEADLINE

Loron Mundiál Anti Korrupsaun, CAC ho entidade relevante lansa ‘Semana Anti Korrupsaun’ 

Loron Mundiál Anti Korrupsaun, CAC ho entidade relevante lansa ‘Semana Anti Korrupsaun’ 

CAC, GOPAC, PDHJ, no CEPAD hala’o konferensia imprensa kona-ba komemorasaun Loron Mundial Kontra-Korrupsaun iha Salaun CAC Farol, kuarta (23/11). Imajen Tatoli /Egas Cristovão

DILI, 23 novembru 2022 (TATOLI)— Komisaun Anti Korrupsaun (CAC, sigla portugés), hamutuk ho intitusaun relevante, kuarta ne’e  lansa ba públiku ‘Semana Anti Korrupsaun’ hodi  komemora loron Internasionál Anti Korrupsaun nian ne’ebé selebra iha loron 09 fulan dezembru tinan ne’e.

CAC hamutuk ho Intitusaun relevante hanesan,  Global Organization of Parliamentarians Against Corruption (GOPAC) Timor-Leste,  Sentru Estudu ba Dame no Dezemvolvimentu (CEPAD, sigla portugés) no Provedoria Direitus Humanus no Justisa (PDHJ) lansa  ‘Semana Anti Korrupsaun’ ne’e ho objetivu atu hasae partisipasaun públiku no ativu  hodi luta ba prevene no kombate korrupsaun no  promove konsensia públiku no enkoraja partisipasaun popular iha fiskalizasaun programa no politika publiku sira estadu nian.

Komisariu CAC, Sergio Hornai hateten, hanesan Estadu parte ba Konvensaun Organizasaun Nasoens Unidas Kontra Korrupsaun (UNCAC)  kada tinan estadu sempre komemora loron Mundial Kontra Korrupsaun ne’ebé sei monu iha loron 09 dezembru. Iha komemorasaun ne’e sei promove aktividade konsiensia públiku ne’ebé hetan partisipasaun husi sosiedade ein jerál.

“Konsidera no konsiente katak luta kontra korrupsaun nu’udar luta nivel estadu nian, tanba ne’e, atu realiza atividade ne’e presiza envolve entidade sira tantu instituisaun estadu no organizasaun sosiedade sivil sira ne’ebé durante servisu iha área prevene no kombate korrupsaun,” Komisariu CAC, Sergio Hornai dehan ba jornalista sira liu hosi konferensia Imprensa ne’ebé halao iha edifisiu CAC, kuarta ne’e.

Nia dehan, iha tinan sira antes ne’e, komemorasaun loron Mundiál Anti-Korrupsaun, mak instituisaun ida-idak organiza no komemora indivualmennte (keta-ketak), nune’a e iha komemorasaun  tinan 2022, instituisaun sira ne’e sei konsolida rekursu no esforsu sira atu komemora hamutuk nu’udar  estratejia atu hasoru inimigo no kauza koletivu ida-ne’e.

Komisariu CAC Sergio Hornai esplika, atividade  sira ne’ebé maka CAC, GOPAC, SEPAD no PDHJ organiza hodi prense perante iha atividade semana Anti Korupsaun ne’e maka hanesan:

  1. Mensajen Estadu husi alta-entidade sira hanesan Prezidente da Republika, Prezidente Parlamentu Nasionál, Primeiru Ministru ne’ebé sei publika iha televizaun nasionál sira
  1. Debate no intervista eskluzivu iha TV entre Komisariu CAC, GOPAC, Sosiedade Sivil no reprezentante akademiku kona-ba tema anti-korrupsaun
  1. Kuis direitu umanus no anti-korrupsaun, pinta dezeñu, jogu amizade, loke filme anti-korrupsaun iha Manatuto. workshop ka seminariu ba estadu sira iha loron 06 dezembru, mensajem no distribuisaun anti korrupsaun husi CEPAD
  1. Semináriu ho partidu polítiku sira ne’ebé sei responsabiliza husi CAC
  1. Lansamentu estudu subvensaun públiku iha SEJD no SEFOPE (CAC). Lansamentu ne’e sei responsavel husi CAC no lansamentu ne’e sei ba realiza iha instituisaun alvu ida-idak (SEJD no SEFOPE)
  1. Kompetisaun hakerek artigu prevensaun korrupsaun (CEPAD-CAC) no prodús video PsA ne’ebé sei transmiti liuhusi knaal TV no Youtube (CEPAD)
  1. Seminariu nasional komemorasaun Mundial Kontra-Korrupsaun iha Aileu – no Produs Mensajem anti korrupsaun iha billboard (GOPAC)
  1. Kuda ai-horis integridade ne’ebé sei fornese husi Ministreiu Agrikultura (CAC, GOPAC, CEPAD no PDHJ)
  1. Seremonia komemorasaun loron mudiál anti-korrupsaun ne’ebé sei halo iha loron 09 fulan dezembru tinan ne’e CAC hamutuk ho instituisaun relavante sira sei organiza  seminariu Nasionál ho tema  ‘Promove Partisipasaun Publiku iha Luta Prevene no Kombate Korrupsaun iha Timor-Leste (CAC)’

“Programa no atividade hirak ne’e ho objetivu atu enkoraza sosiedade, estudante, juventude, no ajente públiku sira liuhusi kampaña sensibilizasaun, semináriu, lansamentu estudu risku korrupsaun iha instituisaun estadu sira, kompetisaun anti-korrupsaun no kampaña ba públiku liuhusi kanál midia komunikasaun hodi kontribui ba prevene no kombate korrupsaun,” Sergio Hornai haktuir.

Nia dehan, CAC,  CEPAD no GOPAC identifika ona instituisaun iha nivél nasionál no munisipál balun no sei halo kordenasaun ba implementasaun programa no aktividade sira ne’e. Alvu husi aktividade ne’e ba kargu diresaun, xefia, estudante no sosiedade sivil.

“Atividade komemorasaun ne’e sei hahú semana rua antes to’o ba loron Mundiál Anti Korrupsaun. Ita sei komemora ho atividade oioin ne’ebé mak balun sei implementa  konjuntu no balun sei implementa ketak-ketak husi CAC, CEPAD no GOPAC tuir  ida-idak nia planu internal.  Maibé, iha loron  09 dezembro, komemorasaun sei hamutuk no konsentra iha fatin ida. Kona-ba ba fatin no tempu atividade depois sei deside iha enkontru tuirmai iha Konsellu Konsultivu, no mós enkontru ho CEPAD no GOPAC,” Sergio hateten.

Entertantu  orsamentu ba aktividade semana anti korrupsaun ne’e sei responsavél iha  kada instituisaun ka organizasaun sei responsavél ba kustu sira relasiona ho despeza ba implementasaun atividade sira ne’ebé temi ona iha leten.

Jornalista : Natalino Costa

Editora     : Armandina Moniz

iklan
iklan

Leave a Reply

iklan
error: Content is protected !!