iklan

DILI, POLÍTIKA

PPN akompaña Bankada Parlamentár hala’o diálogu ho delegasaun AMN

PPN akompaña Bankada Parlamentár hala’o diálogu ho delegasaun AMN

Prezidente Parlamentu Nasionál (PPN), Aniceto Longuinhos Guterres Lopes, akompaña hosi Xefe bankada Parlamentár sira, simu audiénsia hala’o enkontru ho delegasaun Aliansa Maubere Nasionál, kuarta (23/11). Imajen Tatoli/Nelson de Sousa.

DILI, 23 novembru 2022 (TATOLI)—Prezidente Parlamentu Nasionál (PPN), Aniceto Longuinhos Guterres Lopes, akompaña hosi Xefe bankada Parlamentár sira, kuarta ne’e, simu audiénsia hala’o enkontru ho delegasaun Aliansa Maubere Nasionál (AMN) ne’ebé kompostu hosi estudante no sosiedade sivíl.

“Ohin loron ida ksolok tebes ba Parlamentu Nasionál no agradese ba Prezidente PN fó tempu hamutuk ho bankada Parlamentár hasoru malu ho reprezentante manifestante sira,” Vise Bankada KHUNTO, António Verdiál de Sousa, hateten ba jornalista sira hafoin hala’o diálogu ho reprezentante manisfestante iha sala konferénsia PN.

Reprezentante manifestante sira hato’o pontu importante haat (4) durante diálogu ne’e, maibé PN la konkorda mak pronto dahuluk husu atu altera lei distánsia metru 100 ba manifestante sira.

“Atu hato’o de’it katak lei ne’e lei sidadaun hotu kumpre iha Estadu direitu demokrátiku, ne’ebé laiha konkordánsia entre Parlamentu ho saida mak ezije mai hosi reprezentante manifestante sira,” nia dehan.

Tanba ne’e, lei ne’e lahamate liberdade esprensaun iha Timor-Leste sidadaun hotu iha direitu tanba Konstituisaun fó garantia maibé labele halo pertubasaun públiku.

Ezijénsia daruak, nia informa, reprezentante manifestante sira husu atu Parlamentu Nasionál tau matan ba alterasaun lei pensaun vitalisa ne’ebé tinan barak suspende hela iha PN.

Maibé, tuir nia, lei pensaun vitalisa ne’e la’ós tuur ho tuur Deputadu sira halo lae ne’e maibé lei ne’e mai kedas hosi primeiru lejislatura.

Mezmu nune’e, proposta alterasaun hosi Governu haruka mai iha hela internál PN no komisaun A trata hela, nune’e sidadaun timoroan sira hotu hein no desizaun atu altera ne’e orgaun kolejiál plenária nia desizaun koletiva.

Ba KHUNTO nia pozisaun altera lei pensaun vitalisa mak bainhira vota ema Deputadu na’in-lima de’it ne’ebé desizaun hotu iha órgaun kolejial plenária.

Ezijénsia datoluk, AMN husu PN atu tau atensaun ba asuntu edukasaun, saúde, agrikultura maibé órgaun soberania haat ida-idak hala’o nia serbisu, la manda malu maibé interdependénsia ba malu.

“Órgaun soberania daruak iha dever atu rona, haree no observa halerik ne’ebé mai hosi povu, ohin mós iha laran ha’u ko’alia tiha ona katak hotu-hotu hakarak partisipa iha dezenvolvimentu ho umanidade, seriedade ne’ebé la’ós Deputadu sira la rona maibé rona nafatin,” nia hateten.

PN la halo programa no la ezekuta serbisu ba dezenvolvimentu se pergunta sira liga ba asuntu dezenvolvimentu la’ós ba Deputadu sira maibé ba órgaun ezekutivu.

“Tanba ne’e tuir loloos husu ba Governu ne’e kompeténsia ezekutivu nian,” nia dehan.

Kestaun seluk, AMN husu PN atu hapara tradisaun sosa no lelaun karreta luxu.

Reprezentante AMN, Miguel Monce, hateten pontu  haat ne’ebé hato’o hanesan lei pensaun vitalisa tuir nia haree iha diálogu ne’e kuaze bankada hotu konsidera mais sira dehan susar atu muda bainhira partidu ida la manán maiória.

“Ha’u hanoin meiu ida atu kari rai-rahun ba povu no loloos partidu hotu ne’ebé iha asentu Parlamentár iha hanoin atu muda mak buat ne’e fasil tebes. Maibé hotu-hotu hakarak uza sai hanesan mateira kampaña ba tinan oin no ita akompaña sira nia konsiderasaun to’o iha ne’ebé,” nia hateten.

Parte seluk, nia dehan, loos tenke fó sala ba Governu bainhira alokasaun OJE la makaas ba setór estratéjiku sira.

“Ha’u hanoin sira haluha an. Loos duni katak programa orsamentál ne’e Governu mak deside maibé atu liu ka la liu ne’e iha PN, signifika liuhosi fiskalizasaun ne’ebé PN halo mak foin deside ida-ne’ebé prioridade ba povu,” nia dehan.

Durante sorumutu, PN mós hato’o katak Governu sosa karreta barak ba xefe sira maibé laiha protesta tanba sa tenke protesta PN de’it.

“Ita dehan katak loloos imi hala’o imi-nia funsaun check and balance mak di’ak atu kontrola Governu ida iha kada períodu labele gasta osan arbiru. Se gasta osan fundu mina-rai karik ba setór estratéjiku benefísiu direta povu,” nia hateten.

Tuir nia, loos duni la’ós sira mak halo maibé sira mak aseita ka aprova tanba la halo alterasaun buat ruma.

“Sira la aseita ita-nia pozisaun kona-ba hapara tradisaun sosa no lelaun karreta luxu no sira nafafin ho argumentu ne’e mak fiskalizasaun,” nia deham.

Tuir nia, AMN konkorda bainhira karreta sira ne’e uza ba iha operasionál maibé la konkorda fó karreta ida ba membru PN.

“Sira la konkorda totál kuaze iha diálogu Prezidente Parlamentu Nasionál dalaruma to’o agora nervu hela,” nia haktuir.

Nune’e, signifika diálogu ne’e laiha rezultadu no AMN sei nafatin kontinua iha kampus UNTL oin no sei fó sai ba públiku bainhira iha dinámika ruma.

Jornalista : Nelson de Sousa

Editór       : Cancio Ximenes

iklan
iklan

Leave a Reply

iklan
error: Content is protected !!