iklan

NASIONÁL, EDUKASAUN, DILI, HEADLINE, MUNISÍPIU

PAMD prontu apoia dezenvolve setór edukasaun iha sidade Dili

PAMD prontu apoia dezenvolve setór edukasaun iha sidade Dili

Prezidente Autoridade Munisípiu Dili, Guilhermina Filomena Saldanha Ribeiro. Imajen Tatoli/Antonio Daciparu.

DILI, 26 novembru 2022 (TATOLI) – Prezidente Autoridade Munisípiu Dili (PAMD) Guilhermina Filomena Saldanha  Ribeiro, prontu serbisu hamutuk ho diresaun edukasaun munisípiu Dili atu aselera edukasaun atubele dezenvolve di’ak liután kualidade edukasaun iha sidade kapitál nasaun nian.

“Ha’u prontu nafatin apoiu ita-boot sira, maibé ha’u hein imi-nia planu prioridade sira. Tanba ha’u hakarak konvida ita-boot sira-ne’ebé mak serbisu iha área edukasaun, ne’ebé konsidera nu’udar setór importante ne’e atu ita hamutuk tau hanoin ida de’it, oinsá ita atu bele hadi’a edukasaun iha sidade kapitál Dili,” Guilhermina hato’o asuntu ne’e iha serimónia inaugurasaun edifísiu Edukasaun Munisípiu Dili iha Komoro.

Nia haktuir, dezenvolvimentu rekursu umanu iha Timor-Leste atu la’o di’ak tenke investe maka’as iha área edukasaun, tanba edukasaun maka sai pilár ida importante tebes ba futuru.

Hosi progresu fíziku ne’ebé daudaun ne’e la’o hela iha territóriu nasionál maka konstrusaun no reabilitasaun ba eskola sira. iha mós reabilitasaun ba edifísiu sira inklui edukasaun munisípiu Dili nian ne’ebé maka konklui ona no ohin hetan ona inaugurasaun ho kustu $126,228,37.

Prosesu reabilitasaun ba edifísiu ne’e bazea ba kondisaun reál ne’ebé hatudu tristeza ida tanba edifísiu edukasaun iha sidade kapitál ne’ebé konsidera hanesan armazein, ida maka Ministériu Edukasaun oferese ba ninia ema sira atu serbisu hodi tau matan ba nesesidade profesór no estudante sira iha sidade kapitál ne’e.

Projetu reabilitasaun edifísiu edukasaun Munisípiu Dili ne’e realiza tanba hetan konkordánsia entre ema hotu ne’ebé iha kompeténsia ba dezenvolvimentu edukasaun iha munisípiu Dili, molok projetu ne’e tama iha prioridade, uluk liu PAMD tenke konsulta ho konsellu postu administrativu Dom Aleixo tanba fatin ne’e lokaliza iha área refere.

“Ita atu realiza reabilitasaun edifísiu ne’e ita husu uluk ba postu administrativu DombAleixo atu haree uluk projetu reabilitasaun edifísiu edukasaun Dili ne’e importante ka lae. kuandu sira haree katak ne’e prioridade duni maka foin halo desizaun hodi aprezenta ba konsellu konsultivu munisipál,” nia tenik

Maibé grasa de deus edifísiu edukasaun Dili ne’e konklui duni ninia prosesu reabilitasaun tanba parte hotu-hotu konkorda katak edukasaun importante duni, presiza duni edifísiu ida di’ak atu bele garante ambiente serbisu ida armónia inklui fasilidade adekuada.

Diretór Servisu Edukasaun Munisípiu Dili (DSEMD), Carlito da Silva agradese ba esforsu ne’ebé maka PAMD halo ona hodi oferese edifísiu foun ida ho kondisaun ne’ebé di’ak atu apoia servisu edukasaun iha munisípiu Dili.

“Ami laiha buat ida atu oferese ba ita-boot maibé ami bele hato’o de’it agradese ba ita-boot nu’udar ami-nia inan tanba bele komprende didi’ak oan sira-nia hakarak no oan sira-nia futuru atu sai di’ak atubele kompete ho ema seluk,” nia agradese.

Jornalista: Tomé Amado

Editór: Evaristo Soares Martins

iklan
iklan

Leave a Reply

iklan
error: Content is protected !!