ONU kongratula PR Horta kontribui mellora nutrisaun iha TL

DILI, 29 novembru 2022 (TATOLI)— Organizasaun Nasaun Unida (ONU) liuhosi programa Scaling Up Nutrition (SUN) kongratula no fó valór ba Prezidente Repúblika (PR), José Ramos-Horta-nian esforsu hodi kontribui mellora nutrisaun no seguransa ai-han iha Timor-Leste.

ONU hato’o apresiasaun ne’e liuhosi Assitente Sekretáriu Jerál Organizasaun Nasaun Unida (ONU) ne’ebé trata asuntu nutrisaun, Gerda Verburg, tersa ne’e hasoru malu ho Prezidente Repúblika, José Ramos Horta hodi diskute kona-ba asuntu nutrisaun iha Timor – Leste.

“Ohin,  ha’u mai ko’alia ho Prezidente Repúblika atu fó valor tan de’it kona-ba nian lideransa guia nasaun ida ne’e hodi investe barak liu tan iha ema liuliu atu trata asuntu nutrisaun tanba nutrisaun mak meiu ida hodi dezenvolve fiziku ema nian no importante ba dezenvovlimentu nasaun ne’e nia bao in”, Gerda Verburg hateten iha Palásiu Prezidensiál Bairru-Pité.

Daudaun ne’e, Timor – Leste sai ona membru ba Scaling Up Nutrition (SUN) durante tinan rua ona, nune’e Timor -Leste sai hanesan nasaun membru ba-dala 65.

Durante sai membru, nia observa Governu Timor-Leste servisu maka’as tebes oinsá atu hasa’e nutrisaun iha Timor – Leste no asegura seguransa ai-han.

Tanba ne’e, nia rekomenda ba oin Timor-Leste tenke investe maka’as iha ema atu ema bele sai hanesan parte ida bele lori dezenvolvimentu nasionál no ekonomia ba oin.

“Atu dezenvolve maka’as kapasidade ema mak oinsá mak Timor – Leste bele foku liu ba fó susuben inan nian fó ba labarik atu nasaun ne’e prátika liután iha área nutrisaun no seguransa ai-han, hodi dezenvolve liu tan labarik sira nia kakutak”, nia rekomenda.

Ho nune’e, nia fiar metin ho José Ramos Horta nia lideransa sei iha dezevolvimentu atu lori povu no nasaun ba pás, estabilidade no prospreru.

Jornalista: Hortencio Sanchez

Editór     : Florencio Miranda Ximenes