DILI, 29 novembru 2022 (TATOLI)— Portavós Komandu Jerál Polísia Nasionál Timor-Leste (PNTL), Superintendente Xefe Arnaldo Araújo, informa Polisia Nasionál Servisu Investigasaun Kriminál (PNSIK), detein ona suspeitu nain-rua ne’ebé deskonfia asalta no hakanek membru polísia ho inisiál JJ iha área Lahene, suku Lahane, postu Administrativu Nain-Feto, munisípiu Dili.
Kazu asaltu ne’e akontese, iha loron 28 novembru 2022, tuku 9:00, bainhira membru polísia ne’e ho motór liuhosi área Lahene nian atu mai serbisu iha Kaurtél Jerál PNTL-Caicoli, maibé iha dalan derepente hetan asalta hosi grupu joven sira iha ne’ebé tuur iha estrada ho uniforme Grupu Arte Marsiál (GAM) balun.
Maske, membru PNTL ne’e deklara ba joven sira katak, nia nu’udar membru PNTL, maibé joven sira ne’e la fiar no halo kedan asaun hasoru membru refere to’o kanek.
Hafoin akontesimentu, ekipa konjunta kompostu husi Ekipa Investigasaun Movél, Servisu Informasaun Polisia (SIP), Servisu Nasionál Intelijénsia (SNI) to’o iha fatin hodi halo kedan detensaun ba joven nain-rua ho insiál FXDRP (tinan 23) no insiál KJAC (tinan 20).
“Daudaun joven nain-rua ne’e iha ona polisia nian liman hodi submete ba iha identifikasaun”, hateten Portavós Komandu PNTL ne’e ba jornalista sira iha Kuartél Jerál PNTL, Caicoli tersa ne’e.
Portavós ne’e dehan tan: “Sim, informasaun ne’ebé ita rona no rekolla katak joven nain-rua ne’e hosi Grupu Arte Rituál 77, maibé tau fali farda PSHT no IKS nian hodi halo asaun ne’e, maibé ne’e ita entrega ba prosesu identifikasaun maka bele identifika loloos katak sira nian rua ne’e hosi arte rituál ka hosi grupu arte marsiál ne’ebá”.
Portavós Polisia Nasionál Timor-Leste (PNTL), Superintendente Xefe Arnaldo Araujo informa, liu tan kona-ba vitima JJ, nia nudar membru polisia
Daudaun ne’e, vítima membru PNTL ho inisiál JJ ne’e iha kondisaun di’ak ona, hafoin halo tratamentu saúde iha ospitál.
Jornalista: Natalino Costa
Editór : Florencio Miranda Ximenes
