DILI, 29 novembru 2022 (TATOLI)— Vise Prezidente no Chancellor ba Universidade Victoria Austrália, Adam Shoemaker, tersa ne’e, hala’o reuniaun ho Prezidente Repúblika, José Ramos Horta, hodi hakarak ajuda dezenvolve setór edukasaun iha Timor-Leste.
“Ohin, enkontru ho Prezidente Repúblika, hodi ko’alia kona-ba edukasaun no kompeténsi no ideia sira kona-ba oinsa ema bele hadi’a setór edukasaun atu sidadaun sira bele iha aumentu kompeténsia iha nivél edukasaun”, hateten Adam Shoemaker iha Palásiu Prezidensial Dili.
Tanba, tuir nian Timor – Leste ho Austrália iha relasaun forte liu ho Universidade Victoria, nune’e ba oin sira hakarak ajuda Timor – Leste bele ba hala’o estudu iha ne’ebá, maibé nasaun rua tenke iha lai akordu ruma.
Daudaun ne’e, nia dehan seidauk iha akordu ruma entre Timor – Leste ho Universidade Victoria, maibé ba futuru nia espera bele iha tanba nasaun rua iha kooperasaun ne’ebé metin tebes.
Bainhira iha ona kooperasaun, Vise Prezidente ne’e dehan timoroan sira bele ba hala’o estudu iha Victoria iha área oin-oin.
“Relasaun ida ne’e, permite atu estabelese interkambiu ida ne’ebé hanaran kompetensia ba jerasaun foun ka kompetensia sekúlu XXI, kompeténsia ida ne’e importante tebes ba Timor – Leste no Austrália”, katak.
Jornalista: Hortencio Sachez
Editór : Florencio Miranda Ximenes
