iklan

EKONOMIA, INTERNASIONÁL, DILI, HEADLINE

Banku Mundiál: presiza reforma protesaun sosiál hodi hamenus ki’ak iha TL

Banku Mundiál: presiza reforma protesaun sosiál hodi hamenus ki’ak iha TL

Logotipu Banku Mundiál

DILI, 01 dezembru 2022 (TATOLI)— Banku Mundiál iha Timor-Leste no Governu, kinta ne’e, lansa sistema protesaun ba ki’ak sira liuhosi Relatóriu Ekonómiku Timor-Leste ho titulu “Honoring the Past, Securing the future”.

Relatóriu ne’e amostra katak Timor-Leste rejista progresu di’ak iha setór saúde no ekonomia jeralmente,maibé presiza reforma iha área protesaun sosiál atu redús númeru ki’ak no mukit iha nasaun ne’e.

“Iha 2021 ekonómica iha Timor-Leste sa’e 2,9% , maibé iha previzaun atu iha 2022-2023 sei sa’e ba 3,0% hodi rekupera fali xoke bo’ot ne’ebé nasaun hotu inklui Timor – Leste hasoru iha 2020 to’o ohin loron hanesan COVID-19 no alterasaun klímatika”,  informa Reprezentante Banku Mundiál iha Timor-Leste, Bernard Harborne, iha Arquivo no Museu Rezisténsia Timor-Leste, Dili.

Nune’e, nia rekomenda ba Governu Timor – Leste atu reforsa liután protesaun social, nune’e bele utiliza fundu ne’ebé iha ho di’ak. Exemplu hanesan fundu ba veteranu ne’ebé bo’ot tebes bele utiliza fali ho maneira ne’ebé sustentavel hanesan bele investe liu ba ema ki’ik sira, má nutrisaun no utiliza fundu refere to’o tempu naruk labele hotu de’it iha dalan klaran.

Ho nune’e iha relatoriu ne’e fó sai katak, Timor-Leste nia ekonomia rekupera ho neneik husi krize ekonomiku foin lalais ne’ebé kauza husi COVID-19 no mos impaktu husi estragu sira husi siklone Seroja.

Relatóriu mós sita katak hafoin kreximentu negativu durante tinan tolu nia laran, PIB naun-petrolíferu per kapita seidauk fila fali ba nivel pré-pandemia. Inflasaun presu konsumidores atinje 7.9% iha fulan Augustu, nu’udar taxa ida aas liu iha rejiaun Sudeste Ázia Pasífiku.

Inflasaun ba folin ai-han sa’e ba 8.3%, balun tanba aumentu iha presu ai-han global afeta husi kustu transporte no adubu ne’ebé aas.

Maske, nia hatutan  iha ona diminuisaun husi impaktu pandemia nian, nivel despeza governu la fila-fali ba nivel pre-COVID-19 no kombina ho nivel reseita domestika ne’ebe ki’ik, sustentabilidade fiskal kontinua sai preokupasaun bo’ot.

Tanba reseita petrolíferu ne’ebe atu hotu ona iha tinan 2022 no laiha tan kampu produsaun foun ne’ebe tama ka mudansa iha politika fiskal governu nian, balansu ne’e sei hotu iha tinan 2034.

“Konsolidasaun fiskal no hadi’a kualidade husi despeza públiku sira importante tebes atu hodi aseleira no sustenta dezenvolvimentu ekonómiku bainhira Timor-Leste fila-fali ba nia faze kreximentu”, tenik Bernard Harborne.

Tanba ne’e, nia rekomenda Governu presiza hadi’a dezempeñu husi Sistema Protesaun Sosial hodi hamenus ki’ak, hodi bele ajuda  povu ne’ebé presiza tebes no gasta osan ho maneira di’ak liu duke gasta osan barak liu.

Ho sistema nasionál ba protesaun sosiál ne’ebé fó benefísiu no servisu lubuk ida, Timor-Leste iha taxa despeza protesaun sosiál ne’ebé aas liu iha mundu ne’ebé dezenvolve daudaun.

Iha 2019, totál despeza ba protesaun sosiál mak 7% husi PIB naun-petrolíferu, no besik 70% mak aloka ona ba programa Pensaun Veteranu sira nian no ho kobertura ne’ebé ki’ik no adekuasaun ba benefísiu sira ne’ebé fó ba labarik no inan sira, inklui ema ki’ak no vulnerável sira.

Krize fiskál ne’ebé antisipa tanba reseita mina ne’ebé tun sei fornese fatin ne’ebé ki’ ik atu aumenta despeza protesaun sosiál, maibé iha oportunidade barak liu atu hadi’a ninia efisiénsia tomak no asegura alokasaun rekursu sira ne’ebé di’ak.

Iha biban hanesan, Ministru Finansa (MF), Rui Augusto Gomes, hateten laiha protesaun sosiál ba ema ho vulneravél ki’ak ne’e sei aumenta iha nasaun ne’e no aumenta kustu ba estadu rasik bele halo tarde kreximentu ekonómiku no dezenvolvimentu nasionál.

Tuir dadus Governu nian iha 2014 ki’ak iha Timor-Leste hamutuk 42%,  maibé tinan oin Governu sei halo estudu kona-ba ki’ak iha rai laran.

“Maske tinan oin halo estudu ba ki’ak iha rai laran ho programa baziku sira hanesan ita dezenvolve tiha durante tinan barak ne’e iha impaktu pozitivu, hanesan transferénsia públika sira ne’e, uma kbiit laek, sesta bazika, aumenta subsidiu ba ferik no katuas ida ne’e mak medida no politika sosiál ne’ebé dezenvolve atu hamenus ki’ak”, katak nia.

TL deve Banku Mundiál millaun $350

Governu Timor -Leste deve hala’o imprestimu hosi Banku Mundiál hamutuk millaun $350 hodi hala’o hela prosesu dezenvolvimentu.

“Timor – Leste impresta millaun $350, maibé osan ne’e millaun $300 mak ba iha imprestimu no  millaun $50 ba iha garantia,” dehan Bernard Harborne  iha Dili, kinta ne’e.

Daudaun, Banku Mundiál sei la fó garantia hanesan uluk ona tanba Timor – Leste rasik iha fundu petrolíferu rasik, nune’e bele foti imprestimu hosi Banku Mundial, maibé atu selu fali iha tempu naruk.

“Ami laiha sansaun ruma bainhira selu kle’ur, maibé selu kle’ur liu mak nia juru ne’e sei iha tuir tempu ne’ebé iha no funan ne’ebé ami fó ba Governu ne’e ki’ik tebes laos hanesan banku sira seluk, kada osan iha nia varidade tanba la hanesan, maibé nia funan iha 0, 5 to’o 1,5%”..

Osan imprestimu hirak ne’e barak liu iha ba infrastrutura hanesan hadi’a estrada, ajuda ba área agrikultura, investe mós ba área edukasaun no saúde.

Banku Mundial eziste iha Timor – Leste atu halo parseiru ho Governu hodi dezenvolve nasaun ne’e sai di’ak liu iha futuru mai ba jerasaun foun sira.

Jornalista: Hortencio Sanchez

Editór      : Florencio Miranda Ximenes

iklan
iklan

Leave a Reply

iklan
error: Content is protected !!