iklan

HEADLINE, SEGURANSA

Komandu PNTL nomea Henrique da Costa asume kargu Xefe Departamentu Pesoál-Formasaun

Komandu PNTL nomea Henrique da Costa asume kargu Xefe Departamentu Pesoál-Formasaun

Komandante PNTL Munisipiu Dili, Superintendente Henrique da Costa. Imajen Tatoli/Francisco Sony

DILI, 01 dezembru 2022 (TATOLI)— Komandu Polísia Nasionál Timor-Leste (PNTL), deside hodi nomea hikas fali Superintendente Xefe, Henrique da Costa, ne’ebé nu’udár Komandante Polísia Munisípiu Díli, ba asume hikas fali kargu Xefe Departamentu Pesoál no Formasaun iha Kuartél Jerál.

Komandu PNTL mós nomeia Superintendente Asistente Polisia Luis da Silva asumi kargu hanesan Xefe Departementu Transporte no Manutensaun iha Komandu Jerál PNTL.

Komandante Jerál PNTL, Komisáriu Faustino da Costa, esplika nomeasaun ba subtituisaun ne’e bazeia ba lei orgánika PNTL númeru 55/2022, ne’ebé durante fulan ida tama vigór ona.

“Tuir loloos tinan tolu maka foin implementa estrutura sira, maibé Komandu Jerál PNTL foti inisitiva hahú implementa ona lei organika foun ne’e hodi halo nomeasaun ba Komandante Munisipiu sira, tanba tuir lei orgaánika PNTL foun la admite  membru PNTL foun asume kargu Komandante Munisipiu kle’ur liu”, Komisáriu Faustino hateten hafoin serimónia pose iha Kuartél Jerál-Caicoli, kinta ne’e.

Komisáriu Faustino esplika Xefe Departementu Pesoál no Informasaun ne’e nia funsaun atu tau matan ba rekursu umanu iha PNTL, halo serbisu administrative direta ba iha Sentru Formasaun Polísia hodi dezeña kurikulu formasaun ba membru PNTL sira hahú hosi formasaun báziku ba PNTL to’o formasaun espesilizada.

“Daudaun ita mós hahú halo revizaun ba kona-ba kurikulu formasaun ajente polisia no halo alterasaun ba kurikulu rejime rekrutamentu PNTL, entaun Departementu ida ne’e, nesesita tebes ba ita atu hahú forma nia estrutura. Tanba ne’e, Komandu PNTL fó pose ba Komandante Henrique da Costa hodi asume kargu iha ne’e”, katak.

Komandu PNTL mós halo nomeasaun bazeia ba despaisu hosi Komandante Jerál PNTL nian ho númeru 405/CG-PNTL/novembru/2022. Alende ne’e, liuhosi despaisu Komandu Jerál PNTL nian númeru 417/ CG-PNTL/novembru/2022 nomeaa fali Superintendente Polisia Justino Menezes atuál  Komandante Munisipiu Ainaro ba asume fali kargu nu’udar Komandante PNTL Munisipiu Ermera hodi troka atuál Komandante Superintendente Polisia Ligeiro Lay.

Enkuantu, Komandante Superintendente Polisia Ligeiro Lay ba assume fali kargu nu’udar Komandante PNTL Aileu.

Nune’e mós nomea Superintendente Polisia Paulino do Carmo Pereira  assume fali kargu nu’udar Komandante PNTL Munisipiu Ainaro hodi troka Komandante PNTL munisipiu Ainaro Justino Menezes.

Kona-ba nomeasaun Komandante Munisípiu Dili, Komisáriu Faustino informa iha tempu badak sei nomea superiór PNTL ida hodi asume fali kargu ne’e, maibé daudaun ne’e interinamente asume hosi Segundu Komandante PNTL Dili, Superintendente Polisia João Sancho Pires.

“Ha’u hanoin kargu Komandante Munisipál Dili se la kle’ur.Tanba ofisiál superiór  PNTL ne’ebé atu okupa kargu Komandante PNTL Munisípiu Dili sei halo nia estudu iha rai li’ur, semana ida tán nia konklui nia estudu  kuandu nia fila sei simu pose iha tempu badak”, katak.

Jornalista: Natalino Costa

Editór      : Florencio Miranda Ximenes

iklan
iklan

Leave a Reply

iklan
error: Content is protected !!