DILI,02 dezembru 2022 (TATOLI)— Komissaun Nasionál Organizasaun Nasaun Unida ba Educação, Siênsia no Cultura iha Timor-Leste (CNTL-UNESCO) fó prémiu ba traballu eskolár na’in-21 iha área siéncias no matemátika ne’ebé hanesan manán na’in hosi estudante terseiru siklu ensinu sekundáriu no superior.
Inisiativa ne’e mosu iha ámbitu loron Mundial ba siénsia hosi Pás no Dezenvolvimentu ne’ebé selebra anualmente loron 10 dezembru. Entre eskola sira grupu alunu ne’ebé di’ak liu mak Institutu Superior São João de Brito, Liquiçá.
Sekretáriu-Exekutivu CNTL-UNESCO, Francisco Barreto, esplika katak grupu estudante 50-resin mak aprezenta nia kandidatura, maibé barak mak liu iha selesaun.
“Iha eventu ne’e atu hatudu estudante sira nia obra iha área teknolojia, balun matemátika no siénsia mak halo avaliazasaun hodi hili se mak manán. Atividade ne’e durante loron rua, no partisipa iha atividade ne’e mai husi terseiru siklu, ensinu sekundáriu sira husi munisípiu haat hanesan Lautem, Viqueque, Bobonaro no Dili”, afirma responsável ne’e iha Bairru-Pité, Dili, sesta ne’e.
CNTL-UNESCO atribui prémiu $150 ba grupu estudante 21 ne’ebé nu’udar manán-nain liuliu ba ekipamentu siénsia no matematika ba nivel reseiru siklu, ensinu sekundariu, no universitariu bazeia ba sira nia tópiku ne’ebé mak sira dezenvolve hodi mai hatudu, no sira ne’ebé mak tópiku favoritu fó $100. Júri ba avaliasaun ne’e hosi Ministériu Edukasaun Juventude no Desporto.
Vensedor iha área siénsia mak Julito Miguel, hosi grupu Fakuldade Engeñaria, Siénsia no Tecnolojia Universidade Nasional Timor Lorosa’e, afirma katak sente satisfeitu ba eskolla CNTL-UNESCO, nune’e prémiu ne’e hanesan insentiva ba dezenvolvimentu no inovasaun via teoria sientífika.
“Dezenvolve uma carrinha inteligente (Karreta Matenek), usando a investigação científica. Usamos metais que encontramos no lixo para construir a carrinha”, contou Julito Miguel.
“Ami dezenvolve karreta matenek liuhosi uza teória siéntista sira no ami hili besi aat sira ne’ebé mak ema so’e iha lixu, ida ne’e mak ami halo fila-fali ba karreta tuir ami nia matenek ne’ebé mak iha”, konta Julito Miguel.
Atividade ne’e konta ho apoia finaseiru hosi empresa Santos ho valór $35.000.
Jornalista : Felicidade Ximenes
Editór : Florencio Miranda Ximenes
