iklan

INTERNASIONÁL, DILI, HEADLINE

Japaun iha kompromisu kontinua apoia dezenvolvimentu Timor-Leste

Japaun iha kompromisu kontinua apoia dezenvolvimentu Timor-Leste

Prezidente Repúblika, José Ramos-Horta, simu karta kredensiál hosi Embaixadór Japaun iha Timor-Leste, KIMURA Tetsuya, iha Palásiu Prezidente Nicolau Lobato, Bairru Pité, Dili, segunda (05/12). Imajen Tatoli /Egas Cristovão

DILI, 05 dezembru 2022 (TATOLI)— Governu Japaun iha kompromisu hodi kontinua hametin kooperasaun bilaterál ho Estadu Timor-Leste hodi apoia dezenvolvimentu iha setór edukasaun, ekonómia, infraestrutura no prosesu dada kadoras Greater Sunrise mai Timor-Leste.

Kompromisu ne’e hato’o hosi Embaixadór foun Japaun Kimura Tetsuya, iha ámbitu entrega karta kredensiál ba Prezidente Repúblika (PR), José Ramos-Horta iha Palásiu Prezidensiál Nicolau-Lobato, Bairru-Pité.

Xefe Estadu simu karta kredensiál hosi Embaixadór foun Japaun mai Timor-Leste Kimura Tetsuya hodi troka Embaixadór tuan Toshihide Kawasaki.

“Iha hasoru malu ne’e, Embaixadór foun ne’e halo diskusaun kle’an ho Prezidente Repúblika kona-ba kooperasaun no relasaun bilateral nasaun rua nian”, dehan Vise Ministru Negósiu Estranjeiru no Kooperasaun (MNEK), Julião da Silva, ba Jornalista sira.

Iha sorumutu ne’e, PR Horta aprezenta mós prosesu dezenvolvimentu Timor-Leste nian durante tinan 20 liu, nune’e Xefe Estadu nia husu nafatin Japaun nia apoiu ba Timor-Leste iha prosesu dezenvolvimentu iha área ekonómika, Greater Sunrise no adezaun Timor-Leste nian ba ASEAN.

Kooperasaun Japaun ho Timor-Leste durante ne’e liu hosi Japan International Coperation Agency (JICA), liuhosi fó bolsa estudu ba Timoroan ba estuda iha Japaun liu 300-resin, apoiu iha setór agrikultura no tinan oin Japaun sei hala’o konstrusaun ba Aeroportu Internasionál Prezidente Nicolau Lobato Comoro.

Alende ne’e, Japaun nia Agência internasionál balun hanesan JICA mós apoia másimu loos ba dezenvolvimentu Timor-Leste nian iha Greater Sunrise.

Jornalista: Hortencio Sanchez

Editór       : Florencio Miranda Ximenes

iklan
iklan

Leave a Reply

iklan
error: Content is protected !!