iklan

HEADLINE, SEGURANSA

Servisu Migrasaun deporta sidadaun estranjeiru na’in-42

Servisu Migrasaun deporta sidadaun estranjeiru na’in-42

Serbisu Migrasaun deporta sidadaun estranjeiru sira tanba halo serbisu ilegalmente iha TL hodi uza viza turista. Imajen/António Gonçalves

DILI,05 dezembru 2022 (TATOLI)— Tuir dadus estatístika hahú hosi janeiru to’o novembru 2022, Diresaun Jerál Servisu Migrasaun (DGSM), iha Ministériu Interiór (MI), konsege deporta imigrante ilegál na’in-42 tanba viola lei migrasaun.

Migrasaun Timor-Leste deporta imigrante ilegál hirak ne’e tanba identifika halo servisu ilegál liuliu kontra Lei Migrasaun no uza vistu turista, maibé hala’o servisu no negósiu ki’ik iha Timor-Leste.

“Durante fulan 11, ita rejista movimentu ema tama sai iha territóriu nasionál hamutuk 8.000-resin, hosi númeru ne’e deteta imigrante ilegál nain-42 liuhosi operasaun, nune’e ita halo abandona voluntáriu ka deporta sira sai hosi territóriu nasionál hodi fila ba idak-idak nia nasaun,” Adjunta Diretór Jerál Serbisu Migrasaun, MI, Inspetora Xefe Polisia Adelaide de Rosa, ba jornalista sira iha nia kna’ar fatin Ministériu Interiór Caicoli, segunda ne’e.

Imigrante illegal ne’ebé konsege deporta ne’e mai hosi nasaun viziñu ka Indonézia na’in-34 Cambodia nain-neen, Pakistaun na’in-ida no Bangladesh na’in-ida.

Nia afirma abitante hirak ne’e hetan deportasaun tanba maioria mai ho vistu turista, maibé hala’o fali atividade negósiu ki’ik iha Timor-Leste la ho autorizasaun.

Tuir lei bainhira identifika sira hala’o servisu ilegál tenke selu multa hosi $30,00 to’o $200,00 depende prosesu identifikasaun no infrasaun.

Nune’e, hahú janeiru to’o novembru 2022, Diresaun Jerál Servisu Migrasaun konsege rekolla reseita ba kofre estadu hamutuk millaun $1,4.

“Totál reseita ne’e, mai hosi sidadaun viajen sira ne’ebé sosa visa on arrival, ne’ebé ita aplika iha postu Serbisu Imigrasaun sira hotu hanesan iha portu, aeroportu no fronteira Terrestre inklui   estensaun vistu sira iha sede serbisu migrasaun no selu koema sira”, nia afirma.

Adjunta Diretór Migrasaun dehan, sira-nia parte sei kontinua halo nafatin operasaun hodi identifika traballadór sira ne’ebé halo servisu iha kompañia privadu no internasionál tenke kumpre lei hodi servisu ho legál.

“Ita prevee tiha ona osan, nune’e iha tempu badak monta ofisiál delegasaun territoriál ida iha Suai hodi kontrola munisipiu haat, atubele halo kontrolu pontu entrada sira di’ak liután iha futuru”, nia kompromete.

Migrasaun mós koopera nafatin ho traballadór sira ne’ebé uza vistu turista servisu iha Timor-Leste bele halo renovasaun ba sira-nia vistu turista ba vistu traballu, inklui fasilita sidadaun hirak ne’e trata sira-nia vistu estadia temporáriu no vistu autorizasaun rezidénsia.

Jornlista: Natalino Costa

Editór    : Florencio Miranda Ximenes

iklan
iklan

Leave a Reply

iklan
error: Content is protected !!