EUA-MESSK asina akordu kooperasaun fasilita interkámbiu ba estudante superiór
DILI, 06 dezembru 2022 (TATOLI)— Estadu Unidu Amérika (EUA) liuhosi nia Embaixada iha Timor – Leste hamutuk ho Governu Timor-Leste liuhosi Ministériu Ensinu Superiór no Siénsia no Kultura (MESSK), tersa ne’e, asina akordu hodi reforsa kooperasaun bilaterál iha área interkámbiu akademista ka estudante superiór.
Akordu ne’e sita, Governu nasaun rua konkorda hamutuk hodi enkoraja kooperasaun interkámbiu ba estudante sira, dosente, pesoal akademiku sira, interkámbiu ba informasaun no péritu sira iha dezenvolvimentu ba área edukasaun superiór.
“Estadu Unidu Amérika halo ona parseria ba tinan naruk ho Timor -Leste liuhosi fornese bolsa estudu ba Timoroan hirak ne’ebé ho prestasaun hodi buka oportunidade ba edukasaun no interkámbiu iha Estadu Unidu”, dehan Enkarregadu Negósiu EUA iha Timor-Leste, Tom Daley, iha Ministériu Negosiu Estranjeiru no Kooperasaun (MNEK) Dili.
Alende ne’e, asina MoU entre EUA ho Timor – Leste iha área edukasaun hanesan parte ida hosi EUA atu haburas liután parseria nasaun rua nian.
“EUA sei oferese adisionál bolsa estudu hamutuk sia ba Timoroan sira hodi hala’o edukasaun no peskiza iha Estadu Unidu, ami buka hametin ita nia kooperasaun hodi tulun avansa Timor – Leste nia planu estratéjiku dezenvolvimentu nasionál”,katak.
Bolsa estudu sia ne’e sei oferese iha tinan oin liu hosi espasu haat ba estudante timoroan sira hodi estuda iha nivel mastradu iha EUA liuhosi programa Fulbright Scholar-In- Residence.
Iha biban hanesan, Ministru Longunhos dos Santos hateten, asina nota memorandu ne’e liga liu ba edukasaun iha interkambiu hare lkiu ba oinsa mak bele públika jornal sentifika iha seminariu no konferensia nasionál sira tuir fali mak iha interkambiu pesoal akademiku dosente no estudante nian no mós ho asuntu preoridade ida promove formasaun lian ingles ba sidadaun hirak ne’ebé hakarak nune’e bele hetan oportunidade ba bolsa estudu ba EUA.
“Bolsa ne’e ita sei hare fila fali ba liu iha área saida saida mak Estadus Unidus Ofrese tuir nesesidade nasaun Timor – Leste iha. Bolsa estudu ne’e iha tipu oi-oin, ida mak bolsa kompletu, ida bolsa parsial no ida ohin koalia ne’e kona-ba bolsa parsial nian,” nia relata.
Iha bolsa ne’e, finansiamentu propinas eskola nian toma konta hosi EUA no Governu Timor – Leste sei toma konta iha nesesidade vida estudante sira nian bainhira hala’o estudu iha EUA.
MESSK konsidera katak memorandu intendimentu ida ne’e sei tulun Timor-Leste hodi hasai nia kondisaun atubele kumpre objetivu iha setór ensinu superiór hanesan xave ida no área prioridade sira ba interese nasionál.
Iha tinan 20 nia laran EUA fó ona oportunidade Timoroan hamutuk 600 resin hodi tuir oportunidade edukasaun no programa interkambiu inklui liu hosi Fulbright bolsa estudu US-Timor – Leste (USTL), Inisiativa Lider Foin-Sa’e Sudeste Aziatiku (YSEALI) no seluktan.
Jornalista: Hortencio Sanchez
Editór : Florencio Miranda Ximenes
