MS husu apoiu parseiru dezenvolvimentu atu kombate moras hada’et
DILI,06 dezembru 2022 (TATOLI)—Ministra Saúde, Odete Maria Freitas Belo, husu apoiu fundu ba parseiru dezenvolvimentu nasionál no internasionál-sira atu kombate moras hada’et iha Timor Leste.
Deklarasaun ne’e, Ministra Saúde hato’o iha reuniaun entre membru sira husi Mekanismu no Koordenasaun Timor-Leste ba kombate moras hadaet hanesan malaria,HIV/SIDA no tuberkoluze to’o tinan 2025.
“Fundu Globál sei la kansela nia apoiu fundu ba Ministériu Saúde hodi kombate moras tolu hanesan HIV/SIDA, malária no tuberkoluze iha Timor-Leste”, dehan Ministra Odete F ba Agência TATOLI iha Manleuana Dili, tersa ne’e.
Tuir nian, maske nasaun dezenvolvidu sira maioria kombate ona moras hirak ne’e, maibé sei kontribui nafatin orsamentu ba Fundu Globál atu kontinua apoia finanseiru ba nasaun sira ne’ebé mak ki’ak, nune’e bele kombate mós moras refere.
Molok ne’e, Diretora-Ezekutiva husi Organizasaun Naun Governmental (ONG) Estrela +, Ines Lopes, husu ba Governu, liuhusi Ministériu Saúde atu aloka orsamentu ba kombate moras hadaet iha Timor-Leste.
“Fundu Globál apoiu orsamentu ba programa tolu hanesan Malaria, HIV/SIDA, no Tubekoluze, maibé Governu tenke aloka osan ba kombate moras hada’et, tanba ne’e ha’u preokupa ho orsamentu, karik Fundu Globál kansela nia apoiu, solusaun saida mak ita atu rezolve”, nia afirma.
Ines Lopes konsidera Ministériu Saúde iha ona kompromisu atu aloka osan 20% husi Orsamentu Jerál Estadu ba programa tolu ne’e.
Jornalista : Felicidade Ximenes
Editór : Florencio Miranda Ximenes
