KUPAUN, 07 dezembru 2022 (TATOLI) –Asosiasaun Taekwondo Rejiaun Oé-Cusse (ATRO), tersa ne’e submete ona lista atleta sira hamutuk na’in-20 ba komisaun organizadora iha eventu Kepala Kejaksaan Tinggi (KAJATI) iha distritu Kupaun, provínsia Nusa Tenggara Timur (NTT), Repúblika Indonézia, tanba tuir kaléndariu iha loron sesta, 09 dezembru hahú abertura.
Hosi atleta na’in-20 ne’e mane sia (9) feto 11 ne’ebé akompaña hosi treinadór hamutuk na’in-haat (4), ne’ebé dezloka hosi Rejiaun Administrativa Espesiál Oé-Cusse Ambeno to’o distritu Kupaun iha domingu, 4 dezembru 2022 ne’e.
Jestór ATRO, Jacob Efi, informa, atleta dezloka mai antes tanba distánsia dook, afeta ba sira-nia saúde, entaun atleta sira mai sedu hodi deskansa no prepara estamina, molok eventu ne’e hahú.
“Ita hatama ona lista atleta sira hosi RAEOA hamutuk 20 ba komisaun sira atu haree, no prepara ba tecnical meeting no tetu todan, tanba kuarta ne’e ba klase pra-kadet no kadet hahú tetu todan téknikál sei hala’o iha kinta, no iha sesta semana ne’e hahú abertura,” Jacob Efi, informa ba Agência Tatoli iha distritu Kupaun, kuarta ne’e.
Responsável másimu Taekwondo RAEOA ne’e, informa, objetivu Taekwondo RAEOA partisipa iha eventu internasionál ne’e, hanesan oportunidade ida, atu promove atleta sira-nia talentu nu’udar preparasaun fini ba futuru, karik iha prestasaun di’ak, sira-bele envolve iha selesaun nasionál, hodi repreza Timor-Leste partisipa iha eventu internasionál hanesan Asean Games, limpiade no eventu internasiomnál sira seluk.
“Tán ne’e Asosiasaun Taekwondo RAEOA, komesa hanoin ona, atu prepara oinsa Oé-Cusse oan sira mós iha talentu di’ak, ita lori sira mai iha eventu internasionál sira hanesan daudaun ne’e iha Kupaun, iha futuru karik iha prestasaun kualidade di’ak ita-bele ba partisipa iha eventu internasionál sira seluk,” nia afirma.
Nia parte agradese ba Autoridade RAEOA, lideradu Arsénio Paixão Bano, tanb ho inisiativa di’ak, hodi apoia finansiamentu hamutuk dollar amerikadu rihun $10, ba Asosiasaun Taekwondo RAEOA hodi bele mai partisipa iha eventu KAJATI iha Kupaun, Indonézia
Entretantu, tuir kaléndariu kompetisaun ne’e sei abertura iha sesta, 09 dezembru semana ne’e, nune’e iha loron kuarta ne’e, atleta klase pra-kadet no kadet, sei partisipa hosi tetu todan no idade molok integra iha eventu refere.
Purtantu, treinadór ne’ebé akompaña atleta na’in-20 ne’e mak hanesan, manajer Jacob Efi, treinadór José Fransisco Efi, Sosilu Hadi Bernardo, Roger de Fatima.
Jornalista: Abílio Elo Nini
Editór: Evaristo Soares Martins
