AIFAESA divulga lei atividade komersiál ba operadór ekonomia iha TL
DILI, 09 dezembru 2022 (TATOLI)—Autoridade Inspesaun no Fikalizasaun Atividade Ekonómika Sanitária no Alimentár, Institutu Públiku (AIFAESA, I.P), sesta ne’e, realiza semináriu kona-ba divulgasaun papél AIFAESA nian ligasaun entre instituisaun Estadu nian tuir regra sira ne’ebé regula atividade komérsiu iha Timor-Leste.
Semináriu ne’e nu’udar fulan ikus ba tinan ida ne’e, hodi divulga nia papél ba oporadór ekonómiku sira iha Timor-Leste. Tanba AIFAESA hanesan autoridade inspesaun ida ne’ebé hodi kontrola atividade ekonómika iha territóriu laran tomak atu garante kumprimentu ba lei no dekretu-lei sira ne’ebé regula atividade komersiál sira.
Durante ne’e, AIFAESA,I.P hala’o inspesaun ba atividade operadór ekonómiku sira tuir dekretu lei númeru 26/2016, 29 juñu, ba atividade rejime infrasaun administrativa kontra ekonómia no seguransa alimentár, dekretu-lei númeru 23/2009, 5 agostu, nune’e ba regulamentu insdústria no komersializasaun jéneru alimentísiu no dekretu lei númeru 28/2011, ba protesaun konsumidór mak lei némeru 8/2016 8 jullu.
“Entaun liuhosi semináriu ne’e ita divulga lei sira ne’e bai ta-nai oporadór ekonómiku sira oinsá sira bele hatene lei sira ne’e, atu hala’o atividade komérsiu labele implika ba sira-nia atividade, tanba ita iha lei kompletu”, hateten Inspetór Jerál AIFAESA,I.P, Ernesto Monteiro, iha salaun Delta Nova, Dili.
Tuir infrasaun sira ne’ebé inspetór ekonómika sira komete dezde 2017 to’o 2021 mak selu iha tinan 2022 ne’e ho totál $575.660,00, koima refere inklui prosesu balun ne’ebé mak infratór sira la kumpre desizaun AIFAESA,I.P nian, hafoin remete ba Ministériu Públiku foin selu koima.
Iha 2022 nian, hahú hosi janeiru to’o mai novembru 2022 AIFAESA,I.P hala’o inspesaun ba estabelesimentu komersiál hamutuk 3.548.
Hosi totál númeru 3.548 ne’e iha estabelesimentu komersiál 260 mak konsidera kontra ordenasaun ka viola lei, sira ne’e maioria faan produtu liu prazu ho totál 117 no laiha lisensiamentu komersiál 36.
“Prosesu sira ne’e supmete ba parte jurídiku mak sei halo tuir prosesu administrativa hodi ba notifika infratór sira atu mai aprezenta sira-nia atu defeza ba infrasaun ne’ebé sira komete”, katak nian.
Iha fatin hanesan, Ministériu Saúde, Odete Freitas Belo, hateten, atividade ne’ebé AIFAESA,I.P halo ne’e importante tebes ba operadór ekonómiku sira, tanba sira mak hatama sasan mai faan iha Timór tenke komprende lei, nune’e produtu ekonónomiku sira labale fó impaktu ba saúde publiku.
“Ministériu Saúde nian sei ko’alia kona-ba kontrola tabaku iha rai-laran, tanba ita hotu hatene tabaku ne’e, nia impaktu boot ba ema-nia saúde, nune’e liuhosi semináriu ne’e bele fó hanoin ba malu halo kontrola ne’ebé di’ak ba tabaku inklui ba nesesidade báziku sira seluk ne’ebé mós fó risku ba ema-nia vida bainhira la tau atensaun,” nia hateten.
Nune’e, Governante ne’e husu ba operadór ekonómiku sira, sasan ne’ebé hatama mai faan iha Timór tenke ho kuidadu liuliu haree ba ninia data limita sira ne’e no haree sasan ne’e iha kualidade ka la’e, nune’e labele fó impkatu ba konsumidór sira.
Jornalista : Arminda Fonseca
Editór : Florencio Miranda Ximenes
