Atleta Taekwondo feto rua hosi RAEOA kompete iha loron dahuluk hasoru NTT
KUPAUN, 09 dezembru 2022 (TATOLI) – Atleta feto rua hosi Asosiasaun Taekwondo Rejiaun Oé-Cusse (RAEOA), sesta ne’e hahú kompete dahuluk hasoru atleta feto rua hosi provínsia, Nusa Tenggara Timur (NTT) ho klase kyorugi, iha open turnamen eventu Kepala Kejaksaan Tinggi (KAJATI) iha Gedung Desportu (GOR) distritu Kupaun, provínsia Nusa Tenggara Timur (NTT), Repúblika Indonézia.
Atleta feto rua ne’e iha klase juniór ho todan kilograma 46, maka hanesan Adelina da Costa, hosi Asosiasaun Taekwondo Rejiaun Oé-Cusse hasoru atleta Agnesia Bernadete Baros, hosi Taekwondo distritu Kupaun, provínsia Nusa Tenggara Timur (NTT).
Nune’e mós ba klase kadet ho todan kilograma 47, mak hanesan atleta Cherice de Fátima Godinho, hosi Asosiasaun Taekwondo Rejiaun Oé-Cusse, hasoru Jesicca Kolo hosi distritu Timur Tengah Utara (TTU) grupu A, provínsia Nusa Tenggara Timur (NTT).
Jestór Asosiasaun Taekwondo Rejiaun Oé-Cusse, Jacob Efi, informa, RAEOA antes ne’e prepara atleta na’in-20, komposta hosi mane sia (9), feto 11 ne’ebé akompaña hosi treinadór hamutuk na’in-haat (4), ne’ebé dezloka hosi Rejiaun Administrativa Espesiál Oé-Cusse Ambeno to’o distritu Kupaun iha domingu, 4 dezembru 2022 ne’e.
“Ohin na’in-rua hahú kompete uluk, mak feto na’in-rua ne’e, sira-na’in-17 sei kompete iha loron-sábadu, 10 dezembru 2022, no balu sei kompete iha domingu 11 dezembru,” nia informa.
Responsável másimu Taekwondo RAEOA ne’e, informa, objetivu Taekwondo RAEOA partisipa iha eventu internasionál ne’e, hanesan oportunidade ida, atu promove atleta sira-nia talentu nu’udar preparasaun fini ba futuru, karik iha prestasaun di’ak, sira-bele envolve iha selesaun nasionál, hodi reprezenta Timor-Leste partisipa iha eventu internasionál hanesan Asean Games, Olimpiade no eventu internasiomnál sira seluk.
“Tan ne’e Asosiasaun Taekwondo RAEOA, komesa hanoin ona, atu prepara oinsá Oé-Cusse oan sira mós iha talentu di’ak, ita lori sira mai iha eventu internasionál sira hanesan daudaun ne’e iha Kupaun, iha futuru karik iha prestasaun kualidade di’ak ita bele ba partisipa iha eventu internasionál sira seluk,” nia afirma.
Jornalista: Abílio Elo Nini
Editór: Evaristo Soares Martins
