Laiha kombustível, programa distribui karteira eskolár paradu
DILI, 09 dezembru 2022 (TATOLI) – Diretór Nasionál Patrimóniu Lojístika no Teknolojia (DNPLT), Pedro Pinto dos Reis, relata programa distribuisaun karteira eskolár ba eskola sira iha territóriu nasionál paradu tanba laiha kombustível atu enxe ba karreta sira.
Diretór Pedro Pinto dos Reis afirma, distribuisaun karteira eskolár ba eskola iha territóriu nasionál agora atinje ona purvolta 10,000 pares kadeira meza hosi ensinu pre eskolár ba to’o ensinu sekundáriu jerál tékniku vokasionál.
Maibé distribuisaun karteira eskola ne’e agora daudaun labele kontinua halo distribuisaun tanba problema ho kombustível ne’ebé agora laiha tanba foin lalais DNPLT halo movimentasaun makas iha 28 novembru tanba ne’e maka agora daudaun parte lojístika hasoru difikuldade ho kombustível ne’e rasik.
“ita garante katak maske agora labele halo distribuisaun karteira eskolár ba eskola sira maibé tama janeiru ita bele kontinua halo fali distribuisaun tanba mina iha ona,” Pedro Pinto ba jornalista sira iha Salaun MEJD, Vila Verde, sesta ne’e.
Tuir nia, relasiona ho asuntu menus kombustível ne’e ninia parte informa ona ba superiór sira periodikamente liuhosi relatóriu trimestrál ba diretór jerál inklui mós haruka ba gabinete Ministru no Vise Ministru nian.
Jornalista: Tomé Amado
Editór: Evaristo Soares Martins
