MEJD anunsia estudante 57,328 aprovadu iha ezame nasionál
DILI, 09 dezembru 2022 (TATOLI) – Estudante na’in-57,328 hosi eskola nível ensinu báziku, ensinu sekundáriu jerál, ensinu sekundáriu tékniku vokasionál no ensinu rekorrente iha territóriu nasionál aprovadu iha ezame nasionál.
Ministru Edukasaun Juventude no Desportu (MEJD), Armindo Maia, relata katak totál dadus estudante ne’ebé tuir ezame nasionál iha tinan ida ne’e hamutuk 58.134 maibé iha estudante hamutuk na’in 767 maka auzente iha ezame nasionál. Tanba ne’e maka hosi rezultadu ne’ebé hasai ona hatudu katak kuaze estudante hamutuk 57,328 maka aprovadu.
Ministru Armindo relata ba publiku iha sala konferénsia MEJD, Vila Verde, sesta ne’e katak hosi estudante nível ensinu báziku, totál estudante iha territóriu nasionál hamutuk 30.888 maka rejista maibé iha estudante na’in 334 maka auzente ekivalente iha 1,08%.
Estudante ne’ebé prezente hamutuk 30.554 ekivalente kuaze 98,92% ho nune’e hosi nivel ensinu báziku nian iha estudante hamutuk na’in 30.544 maka aprovadu ekivalente kuaze 99,97% no reprovadu iha de’it na’in 10 ekivalente 0,03%.
Nia dehan, estudante nivel ensinu sekundáriu jerál nian, total estudante hamutuk na’in 22.525 maibé iha na’in 353 maka auzente ekivalente 1,57% no na’in 22.172 prezente ekivalente 98,43% ho nune’e totál estudante iha nivel refere kuaze na’in 22.162 maka aprovadu ekivalente 99,95% no reprovadu iha de’it na’in 10 ekivalente 0,05%.
Agora hosi nivel ensinu sekundáriu tékniku vokasionál nian, haktuir governante ne’e katak totál estudante ba tinan 2022 ne’e hamutuk na’in 4.339, maibé iha estudante na’in 98 maka auzente ekivalente 2,26% entaun kuaze estudante ne’ebé prezente iha ezame nasionál ne’e hamutuk 4,241 ekivalente 97,74%. No aprovadu hamutuk na’in 4.240 ekivalente 99,98%, reprovadu iha de’it na’in 1 ekivalente 0,02%.
Portatu nivel Ensinu rekorrente nian iha totál estudante hamutuk na’in 382. Maibé na’in 52 maka auzente ekivalente kuaze 14% no sira ne’ebé prezente iha na’in 330. Ekivalente 86% hosi totál estudante ne’ebé rejista kuaze 100%.
Enkuantu hosi prosesu sira ne’ebé la’o to’o anunsia rezultadu ezame nasionál iha ohin loron 09 de dezembru 2022, ne’e Gabinete Avaliasaun no Dezenvolvimentu Kurrikulár (GADK) halo esforsu lubuk ida tuir prosesu ne’ebé iha hahú hosi fulan janeiru to’o ohin loron hetan ninia rezultadu.
Hosi prosesu hotu atu hetan rezultadu ezame nasionál ba tinan ida ne’e hahú hosi fulan janeiru to’o dezembru tinan 2022 hanesan deskreve ona iha kornograma manuál ezame nasionál nian Atividade sira ne’ebé maka komisaun organizadora realiza ona ho intensaun atu halo susesu ba ezame nasionál iha anu letivu 2022 liu hosi rekolla dadus finalista sira hahú hosi janeiru-marsu 2022.
Jornalista: Tomé Amado
Editór: Evaristo Soares Martins
