Prezidente Parlamentu Nasionál inaugura projetu bee-moos iha RAEOA
OÉ-CUSSE, 09 dezembru 2022 (TATOLI) –Prezidente Parlamentu Nasionál (PPN), Deputadu Aniceto Longuinhos Guterres Lopes, hamutuk ho Prezidente Autoridade Rejiaun Administrativa Espesiál Oé-Cusse Ambeno (RAEOA), Arsénio Paixão Bano, kinta ne’e inaugura projetu kanalizasaun bee-moos hodi benefísia komunidade hamutuk uma-kain 194 iha aldeia Lakufoa, suku Costa sub-rejiaun, Pante Makasar.
Nota imprensa ne’ebé Agência Tatoli asesu liuhosi pájina ofisiál ZEESM, informa, iha serimónia inaugurasaun ne’e, PPN Aniceto Guterres Lopes agradese ba Autoridade RAEOA nia esforsu tomak, tanba tinan ne’e, autoridade tau prioridade ba asuntu bee-mós hodi tulun komunidade sira iha área rurál bele asesu bee-moos.
“Ohin ha’u kontente loos tanba bele hamutuk ho komunidade suku Costa, ita inaugura dezenvolvimentu ida-ne’ebé importante tebes ba inan-aman sira iha aldeia ida-ne’e, ha’u ohin ba oin inan-aman sira iha fatin ne’e sei laiha ona problema kona-bá bee-moos,” refere iha nota imprensa ne’e.
Tuir nia, asuntu bee-moos iha territóriu Timor-Leste, iha fatin barak seidauk asesu másimu, maibé iha Oé-Cusse sufisiente, maske seidauk kobre hotu área rurál sira, maibé neineik sei rezolve hotu.
“Tán ne’e agradese ba Autoridade nia esforsu tomak maske projetu ne’e distánsia kuaze kilometru-lima, maibé tanba kolaborasaun parte tékniku, empreza apoiu mós hosi komunidade, konsege kanaliza mai to’o iha fatin ne’e, ita mós agradese empreza nia serbisu tanba bele finaliza obra ne’e ho kualidade,” nia orgullu.
Prezidente Autoridade RAEOA, Arsénio Paixão Bano, fó hanoin ba komunidade no mós husu apoia hosi Polísia Unidade Fronteira (UPF), tanba obra ne’e lokaliza iha fronteira postu Leolbatan atu tau matan, nune’e bele utiliza to’o tempu naruk.
“Ohin komunidade Lakufoan kontente ona, tanba ita hetan ona fasilidade ida-ne’ebé ita hein kleur ona, entaun ha’u-nia apelu bai mi hotu, hamutuk tau matan ba obra ne’e, iha ne’e besik postu fronteira, ha’u fiar parte seguránsa mós sei tau matan, tanba ita gasta osan Estadu fasilita povu labele susar ba bee-moos, no ita bele utiliza to’o fali ita-nia sira jerasaun tuir mai,” nia husu .X
efe aldeia Lakufoan, José Tacaqui, agradese ba Autoridade RAEOA, tanba iha aldeia ne’e rasik dezde uluk to’o ohin loron, komunidade sei uza bee-matan ba konsumu no nesesidade seluk.
“Maibe tinan ne’e, ho polítika Autoridade bele mai istala ona bee-moos ba ami, maske dook tebes, tanba kanalizasuan ne’e kilometru-lima hosi suku Nipani mai to’o ami-nia fatin, tan ne’e ha’u lori komunidade nia naran hato’o agradese,” autoridade lokál ne’e agradese.
Projetu konstrusaun instalasaun ne’e kanaliza uza mákina bomba nian, ezekuta hosi empreza Amlichoe Unipessoál, Lda, ho valór kontratu $437,411.31, ho durasaun serbisu fulan haat, osan ne’e Autoridade RAEOA aloka hosi Orsamentu Jerál Estadu (OJE) 20222 nian.
Kontrusaun ba projetu instalasuan bee-moos ne’e, konsege benefísia komunidade uma-kain 194 iha aldeia Lakufoan, tanba empreza fasilita hodi instala kedas torneira públiku hamutuk unidade-ualu (8) no harii kedas tanke rezervatóriu rua ba liña distribuisaun nian.
Jornalista: Abílio Elo Nini
Editór: Evaristo Soares Martins
