SECoop realiza semináriu diskute dezenvolvimentu kooperativa no ekonomia kreativa
DILI, 09 dezembru 2022 (TATOLI)—Sekretária Estadu Kooperativa (SECoop,sigla portugés), sesta ne’e, realiza semináriu ho membru movimentu kooperativu hodi diskute kona-ba “Dezenvolvimentu Kooperativa sira no Ekonómia Kreativa”.
Objetivu hosi semináriu mak hala’o avalizasaun nasionál ba dezenvolvimentu kooperativa nian iha Timor-Leste.
“Ita halo avalizasaun ne’e parte importante ida atu identifika dezafiu sira ne’ebé movimentu kooperativa sira hasoru hodi buka nia solusaun ba dezafiu sira ne’e iha future”, hateten Elizário Ferreira, iha salun Tower Fatuhada, Dili.
Durante ne’e, nia dehan dezafiu sira ne’ebé movimentu kooperativa sira hasoru mak menus rekursu umanu, asesu ba finanseiru menus, risku kreditu, kooperativa barak laiha sede no kooperativa barak iha sede, maibé laiha ekipamentu.
“Dezafiu sira ne’e nia solusaun mak ba menus rekursu umanu ba oin ita presiza formasaun edukasaun no informasaun inklui estudu ba área kooperativu,” nia dehan.
Solusaun ba dezafiu asesu finanseiru menus, Sekretáriu Estadu ne’e dehan halo ona kapitalizasaun ba Federasaun Hanai Malu no orienta mikro no empreza ki’ik sira atu adere ba federasaun hodi bele asesu.
Tuir nian risku kréditu ne’e akontese tanba kooperativa iha mós kreditu má paradu ne’e barak tanba definisaun internasionál katak risku kréditu ne’e labele ultrapasa 5%, maibé kooperativa sira iha Timór maioria kuaze 10% mak hetan kréditu.
Nune’e, SECoop motiva movimentu kooperativa-sira no suporta sira atu instala sede hanesan 2021 no 2022, nune’e ajuda ona kontrui sede ba movimentu kooperativa hamutuk 79. SECoop apoiu ona ekipamentu ba movimentu kooperativa 115 hodi hala’o sira-nia atividade administrativu jere pedidu membru sira nian ho di’ak.
“Ita-nia movimentu kooperativa daudaun hamutuk 444 ne’e ba kategória rua iha kooperativa produsaun 317 no kooperativa kréditu hamutuk 127, kapitál ne’ebé akomodadu hosi kooperativa rua ne’e hamutuk milliaun $36”, nia afirma.
Hosi orsamentu milliaun $36 ne’e, liuhosi kooperativa kréditu sirkula milliaun $27 hanesan impréstimu no 90% iha área rurál no 10% iha nasional.
“Membru koopetiva hamutuk 97.000. Konklusaun mak oinsá kooperativa hotuhotu dirijente hotuhotu bele fó importánsia elebora planu hodi asegura bem estar membru kooprativa nian”, katak.
Jornalista : Arminda Fonseca
Editór : Florencio Miranda Ximenes
