VIQUEQUE, 10 dezembru 2022 (TATOLI)—Ahi han uma abitante no uma-lulik ida iha aldeia Fahi Berek, suku Uma Uain Kraik, postu administrativu Viqueque Vila, munisípiu Viqueque, maizumenus tuku 00:50 meia noite.
Vítima inséndiu, Humberto Sarmento Pinto, sente triste tanba insidente ne’e akontese derrepente hodi rezulta vítima sira-nia sasán uma laran la konsege salva tanba ahi han hotu.
“Inséndiu hodi kalan ne’e derrepente de’it. Ha’u hakfodak halai sai lori família sira no sasán sira maibé ami la aproveita tanba kuaze ahi han hotu,” Humberto Sarmento Pinto, hateten ba jornalista sira iha fatin akontesimentu, iha aldeia Fahi Berek, sábadu ne’e.
Akontesimentu ne’e afeta ba uma-kain rua iha uma rua, ho membru família hitu, dapur ida, uma-lisan ida no kios ida.
Notísia relevante: Protesaun Sivil no CVTL fó apoiu ba vítima inséndiu iha Viqueque
Vítima haktuir, sasán sira ne’ebé ahi han maka hanesan dokumentu, roupa, sasán dapur, osan $2.200 inklui sasán iha uma-lisan.
“Ami-nia sasán ahi han moos, agora falta de’it roupa ida ami hatais ne’e de’it. Ahi forsa maka’as, entaun ami halai sai de’it la lori sasán ida,” nia akresenta.
Ahi han uluk uma-lisan maka tama ba uma-boot, nune’e afeita ba dapur no kios. Maski antes ne’e vítima sira tenta kontaktu ba Bombeiru maibé la konsege salva tanba kondisaun karreta ladún di’ak nune’e halo moris jeradór bee ladi’ak.
“Ami seidauk hatene kauza ne’e saida tanba uma-lisan laiha eletrisidade no ami mós la sunu ahi ruma ba laran. Ha’u la deskonfia buat ruma, ahi han ne’e hahú hosi uma-lisan mak afeta ba uma sira,” vítima inséndiu konta tuir.
Iha fatin hanesan, Adjuntu Protesaun Sivil munisípiu Viqueque, Cerilio Soares Gomes, hateten, ekipa Protesaun Sivil hamutuk ho Bombeiru hahú rekolla dadus no verifikasaun estragu uma inklui apoia ona pakote hahán emerjénsia ba vítima sira.
“Kona-ba apoia materiál konstrusaun, bainhira ami sei aprezenta ba nasionál maka foin hetan aprovasaun. Agora ne’e ami rekolla dadus estragu sira ba akontesimentu ne’e ho kategoria estragu totál,” nia tenik.
Jornalista : Vitorino Lopes da Costa
Editora : Julia Chatarina
