DILI, 11 dezembru 2022 (TATOLI)–Diretór Ekola Koléjiu São Jose Operáriu (KSJO) Balide, Padre Cesar Magno, hateten nia parte sei la viola direitu estudante hosi munisípiu sira-nia diretu atu eskola iha KSJO Balide maibé estudante sira-ne’e tenke aprezenta sira-nia razaun forte.
“Se estudante ne’e moris iha Dili, ninia inan-aman hela iha Dili maibé nia ba eskola iha koléjiu ruma iha munisípiu kuandu nia hakarak fila-fali mai eskola iha Dili, mezmu ho diploma hosi munisípiu, ami sei simu nia,” Padre Cesar Magno hato’o asuntu ne’e ba jornalista sira iha ninia servisu fatin eskola KSJO Balidi, Domingu ne’e.
Diretór Koléjiu São Jose Balide hato’o razaun ne’e tanba sira lakohi viola estudante sira-nia direitu liu-liu nu’udar sidadaun timoroan, tanba ema hotu iha liberdade atu eskolla hili fasilidade eskola ne’ebé di’ak mak siraa atu eskola ba.
Ministériu Edukasaun rasik bandu ona atu labele simu estudante hosi munisípiu mai eskola iha Dili ho razaun limitasaun fasilidade sala-de-aula, maibé nia husu ba Ministériu Edukasaun atu buka hadi’a sistema sira-ne’e, nune’e bele garante edukasaun kualidade iha munisípiu sira.
“Ha’u hakarak husu ba ita-nia Governu liuhosi Ministru Edukasaun katak atu labele hakloot estudante sira hosi munisípiu ninia kakutak. Labele iha ema ida mak bele teri-netik sira-nia liberdade ida-ne’e. Tanba ne’e, ha’u sujere ba Ministériu Edukasaun atu iha responsabilidade boot hadi’a sistema edukasaun iha territóriu nasionál ho di’ak atu estudante sira hosi munisípiu labele mai eskola iha Dili,” nia hateten.
Maibé, nia dehan, sistema edukasaun ne’e mak la hetan atensaun hosi Ministériu Edukasaun mezmu Governu bele hatuur maneira oinsá mós sira nafatin tun mai Dili, no kontinua eskola sira iha Dili no ikus mai sala-de-aula sira-ne’ebé la sufisiente kontinua laiha espasu ba estudante sira.
Ne’e duni hosi sistema KSJO Balide nian la taka dalan ba estudante sira hosi munisípiu maibé foku liu ba estudante sira eskola iha koléjiu iha munisípiu maibé antes ne’e sira hela iha Dili no sira-nia inan-aman servisu no hela iha Dili.
Ho nune’e. iha tinan ida-ne’e eskola Koléjiu Balide liuhosi desizaun konsellu profesór deside ona sei loke oportunidade hodi simu estudante foun, tantu hosi ensinu báziku no ensinu sekundáriu jerál kada nivel ho totál 350 másimu no mínimu 300.
Ba estudante nivel ensinu báziku terseiru siklu no ensinu sekundáriu sira, Tanba rezultadu ezame nasionál foin mak anúnsia iha loron 09 dezembru depois nivel munisipál kada eskola sei públika iha loron 12 dezembru 2022, ne’eduni kritériu inskrisaun inísiu ba estudante foun sira-nian presiza uluk mak deklarasaun hosi eskola no mós kartaun ezame nasionál.
Inskrisaun ba estudante foun ensinu báziku no sekundáriu nian sei hahú iha loron 14-16 dezembru 2022 hafoin simu tiha billete hosi eskola.
Estudante sira sei mai tuir teste admisaun iha loron 17 dezembru 2022, ikus liu rezultadu teste ne’e sei rona fali iha loron 20 dezembru 2022.
Hosi rezultadu teste admisaun ne’e kuandu fó sai ona, sé mak pasa maka foin mai halo rejistu hodi kompleta rekizitu sira. dokumentu sira-ne’ebé mak KSJO Balide presiza.
Husu ba estudante sira tenke kompleta mak sertidaun batizmu, diploma estudante, deklarasaun hosi eskola anteriór no mós iha buat seluk tan.
Agora inskrisaun ba estudante foun nivel ensinu báziku primeiru no segundu siklu nian, sei hahú iha segunda feira 12-14 dezembru 2022.
Jornalista : Tomé Amado
Editór : Cancio Ximenes
