Governu seidauk hadi’a irrigasaun Kasameta-Sobabere Seiçal

DILI, 12 dezembru 2022 (TATOLI)—Xefe suku Buruma, postu administrtaivu Baucau Vila, munisípiu Baucau, Liborio Freitas, hateten agrikultura iha munisípiu Baucau to’o agora Governu seidauk hadi’a irrigasaun Kasameta no Sobabere Seiçal.
“To’o ohin loron Governu seidauk hadi’a irrigasaun Kasamata no Sobabere iha ami-nia suku rasik. Bainhira ita liu ba-mai, ita haree iha natar balun ne’ebé kuaze tinan 30 abandonadu. Antes ukun an mós abandona tiha ona to’o ohin loron mós abandona nafatin tanba irrigasaun ne’ebé atu fornese bee mai natar ne’e laiha, entaun natar sira abandona no irrigasaun sira seidauk rezolve. Tanba ne’e mak ba ami agrikultura iha munisípiu Baucau ne’e sei problema hela,” Xefe suku Buruma Liborio hateten ba Agência Tatoli, hafoin partisipa sorumutu nasionál buka dalan alternativu ba dezafiu sira liu-liu setór agrukultura, saúde, edukasaun, bee-moos iha ámbitu komemorasaun loron Direitu umanu ba dala-75 iha Salaun Luz Clarita, Dili.
Xefe Suku ne’e rekomenda ba Ministériu Agrikultura no Peska (MAP) ho Asosiasaun HAK atu nafatin luta ba asuntu prinsipál sira-ne’e.
“Ita lakohi ita-nia inan-aman durante servisu nu’udar agrikultura sira muda sira-nia profisaun ba fali servisu seluk. Tanba ne’e husu atu tau atensaun no presiza hadi’a irigasaun nune’e komunidade iha Seiçal bele halo natar,” nia dehan.
Ida ne’e mak sai problema boot ba komunidade iha suku ne’ebá tanba banihira sira muda ona sira nia profisaun ba profisaun seluk, mak ba futuru ema-ne’ebé servisu hanesan agrikultura ne’e la iha ona, satán oan sira-ne’ebé laiha transferénsia matenek kona-ba agrikultura hodi halo servisu hanesan to’os no natar.
Xefe suku Manutasi, postu Ainaro Vila, Manuela Caldas, hateten komunidde suku rua hosi suku Manutasi no suku Kasa durante tinan rua ona, sira-nia natar abandonaduy tanba irrigasaun ne’ebé fornese bee ba natar sira-ne’e aat, hafoin hetan estragu hosi inundassun iha loron 04 fulan-abríl tinan 2021.
“Ami iha suku Manutasi, suku Casa, Ainaro Vila, munisípiu Ainaro enfrenta problema boot, ami-nia komunidade abandona natar no lahalo natar tanba irrigasaun ne’ebé atu fornese bee ba natar refere aat no oras ne’e seidauk hadi’a,” nia dehan.
Nune’e, xefe suku reprezentante nia komunidade husu Governu katak iha tinan oin mai tenke hadi’a irrigasaun.
Jornalista : Osória Marques
Editór : Cancio Ximenes

