Clarícia Piedade, mellór klasifikadu hosi eskola SACROJES hili tama UNTL
DILI, 13 dezembru 2022 (TATOLI) – Clarícia Piedade Vong Soares termina ninia estudu nu’udar estudante finalista mellór klasifikadu nível ensinu sekundáriu iha eskola Sagradu Corasaun de Jesus (SACROJES) Bekora ho totál valór 57.
Nia mós deside kontinua estudu iha Universidade Nasionál Timor Lorosa’e (UNTL) hodi hili fakuldade medisina.
Clarícia Vong Soares moris iha Dili, loron 06 dezembru 2004, oan hosi Armindo Sores no Merlin da Silva Vong kontinua deside ninia futuru hodi hili eskola iha UNTL tanba hakarak hakmaan todan ne’ebé ninia papa no mama enfrenta durante ne’e.
Clarícia ne’ebé gosta kór azúl no verde ne’e hahú ona ninia inskrisaun iha UNTL hakarak sai estudante foun iha fakuldade medisina atubele ajuda filafali ninia família iha futuru.
Raan hosi Ermera Dili ne’e nu’udar figura simples ida+ne’ebé hatudu ninia karaterístika hakraik-aan maske oras ne’e daudaun valór ne’ebé nia hetan sai debate iha mídia sosiál tanba ninia prodús valór ne’e liu dook tarjetu ne’ebé iha.
Matéria neen (6) ne’ebé nia tenke prienxe ona iha ezame nasionál no ezame lokál ne’e tolu hetan sia (9) mak hanesan kímika, fízika no portugeza no valor tolu seluk hetan sanulu (10) maka iha matéria biolojia, matemátika no ingleza.
Feto-raan ho idade 18 ne’e konfesa maske nia sai ona estudante mellór klasifikadu iha tinan ida ne’e maibé ninia nunka kria oráriu espesífika ida ba nia an atu estuda tuir oras ne’ebé termina ona.
Nia dehan, bainhira hakarak estuda nia foku duni ba matéria ne’ebé nia estuda maibé bainhira kuandu nia iha situasaun ruma ne’ebé la di’ak. Ezemplu hanesan iha hela problema nia laran nia sei la estuda atu nune’e bele evita hodi labele fó presaun ba ninia kakutak.
Maibé nia mós sempre halo konfirmasaun ho meiu komunikasaun eletrónika hanesan youtube bainhira matéria ruma nia ladún komprende.
”Ha’u nunka kria oráriu espesífika ida ba ha’u-nia aan atu estuda tuir oras ne’ebé termina ona. Bainhira ha’u hakarak estuda ha’u foku duni ba matéria sira. Maibé bainhira ha’u iha situasaun ruma la di’ak ha’u sei evita atu la estuda,” Clarícia vong Soares dehan ba Tatoli iha ninia rezidénsia, Bekora, Maufelu, tersa ne’e.
Oan ikus hosi maun-alin na’in+rua ne’ebé gosta de’it halo serbisu dasa rai ne’e hateten, ninia mehi hakarak sai estudante mellór ne’e hahú bainhira nia iha ona segundu siklu ensinu báziku.
Tanba nia sempre haree ba kolega sira seluk hatudu sira-nia kapasidade entaun mosu pergunta hosi ninia aan rasik katak tanba saida maka kolega sira bele, nia labele.
Antes ne’e hosi primeiru siklu ensinu báziku, Clarícia hatudu ona ninia kapasidade nu’udar estudante mellór maibé nia la tama iha primeiru, segundu no terseiru klasifikadu. Esforsu sira ne’e nia hatudu bainhira iha ona ensinu báziku kuatru-anu segundu siklu.
Nia onesta de’it katak susesu ne’e la mai nune’e de’it kuandu estudante ida la halo ninia preparasaun ho di’ak,
Clarícia figura ida-ne’ebé la halo serbisu barak iha uma ne’e haklaken katak, durante hosi nível edukasaun ensinu báziku to’o ikus iha ensinu sekundáriu ne’e nia halo esforsu makas hodi dedika an iha estuda tanba hakarak atu hetan rezultadu di’ak.
“Papá ho mamá ninia apoiua hosi buat hotu haree hosi ekonomia no nesesidade báziku ne’ebé sira na’in-rua oferese mai ha’u ne’e maka ohin ha’u bele hetan susesu, hanesan oan ha’u sei la fó filafali buat sira-ne’e ba sira, maibé ha’u sei hatudu rezultadu ne’ebé di’ak ba sira na’in-rua nu’udar sentimentu agradesimentu.”
Figura nunka fihir ema iha família ne’e durante eskola sempre halo belun ho ema hotu. Nia nunka fihir ema balun hodi sai ninia kolega espesífika ba nia.
Oin ne’ebé midar no hamnasa door sempre sai belun di’ak ho ema hotu. Nunka karak matenek no buka ajuda ninia kolega sira bainhira presiza.
Nia sempre fó korajen atu kolega sira bele hetan susesu iha prosesu ensinu aprendizajen nia laran.
Feto oan mesak ho Jodiak Sagitarias ne’e relata, atu sai estudante ida susesu laloos mai hosi ema seluk maibé fila fali ba ida-idak ninia an rasik.
Jornalista: Tomé Amado
Editór: Evaristo Soares Martins
