Estoke ai-moruk ba ema ho moras mentál menus iha SSM Manatuto
DILI,13 dezembru 2022 (TATOLI)—Diretór Servisu Saúde Munisípiu Manatuto, Mateus Vicente Correia, estoke ai-moruk ba moras mentál hahu menus iha sentru Saúde Manatuto.
“Estoke ai-moruk moras mentál menus durante tinan rua nia laran, nune’e halo pedidu distribuisaun ba SAMES nasional no halo ona distribuiusaun. Tanba ne’e aban ba oin ami halo ona atendimentu ba ema ho moras mentál sira”, Diretór ne’e hateten ba TATOLI via telefonika, tersa ne’e.
Durante estoke ai-moruk menus prejudika tebes ba pasiente moras mentál sira tanba labele halo atendimentu mediku
“Aimoruk mentál ne’e tenke fulan-fulan sona ba pasiente sira , maibé ami Manatuto kuaze ai-moruk laiha afeta tebes pasiente sira”, katak nia.
Tipu ai-moruk ne’ebe laiha mak Flupenazine, Carbamazepine , haloperidol, chlorpromazine no falproit acido.
“Ai-moruk sira ne’e mediku sira haree tuir nia kategoria bainhira sira si’ak liu mak tenke lori ba mini ospitál Laklubar hodi halo tratamentu ne’ebá, maibé ida normál ne’e iha deit munisípiu mak pesoál saúde sira halo atendimentu”, nia afirma.
Nune’e, nia husu ba familia sira ba ema ho moras mentál atu hamutuk ho pesoal saude sira halo akonselamentu hodi bele konsumu ai-moruk regularmente.
Jornalista : Felicidade Ximenes
Editor : Florencio Miranda Ximenes
