Estudante finalista IBTL na’in-30 resin hein hela desizaun MESSK
DILI, 14 dezembru 2022 (TATOLI) – Reitora Institutu Ensinu Superior Privadu Boaventura Timor-Leste (IBTL) Quitéria da Costa, fó-sai katak, estudante finalista hamutuk na’in-30 resin maka preparadu ona atu simu graduasaun maibé hein hela desizaun hosi Ministériu Ensinu Superiór, Siénsia no Kultura kona-ba rezultadu verifikasaun dadus estudante sira nian.
“Ami iha ona estudante na’in-30 resin maka preparadu ona atu simu graduasaun maibé ami seidauk bele deside bainhira mak atu hala’o serimónia graduasaun ne’e tanba ami sei hein hela desizaun hosi ministériu,” Quitéria hateten ba Tatoli liuhosi telefónikae, kuarta ne’e.
IBTL hakarak simu tiha lai rezultadu ruma hosi Ministériu Ensinu Superiór, Siénsia no Kultura maka foin marka planu hodi hatuur kalendáriu ba graduasaun.
Tanba IBTL lakohi foti risku deside tiha loron graduasaun depois laiha desizaun ida hosi MESSK bele hamonu dignidade instituisaun nian.
Estudante finalista 30-resin nee parte instituisaun submete ona ba MESSK, hein de’it prosesu verifikasaun depois presiza publika iha Jornál Repúblika maka foin bele hala’o serimónia graduasaun.
Jornalista: Tomé Amado
Editór: Evaristo Soares Martins
