Governu aprova Dekretu-Lei kriasaun muzeu kulturál Timor-Leste

DILI, 14 dezembru 2022 (TATOLI)— Konsellu Ministru aprova projetu Dekretu-Lei, ne’ebé aprezenta husi Ministru Ensinu Superiór, Siénsia no Kultura, Longuinhos dos Santos, ba kriasaun muzeu kultural Nasionál Timor-Leste.

“Muzeu Nasionál sei responsavel hodi estuda no investiga, inkorpora, inventaria no dokumenta, konzerva, garante seguransa, interpreta, espor no eduka relativa ho sasan kultura sira ne’ebé reprezenta testamuña materiál ho valór sivilizasaun ka kultura timór nian”, hateten Ministru Presidensiál Konsellu Ministru, Fidelis Manuel Leite Mangalhães hafoin reuniaun ezekutivu iha Palásiu Governu.

Ho diploma ne’e, Institutu Públiku ne’e tenke promove espozisaun sasan kultura sira ne’ebé hamutuk ona iha aservu Muzeu Nasionál no entidade sira seluk, públika ka provada, nasionál ka internasionál.

Institutu ne’e mós tenke promove funsaun edukativa ne’ebé respeita ba diversidade kulturál, ho objetivu ba edukasaun permanente, partisipasaun komunidade no aumentu diversifikasaun públiku nian sira.

Alende ne’e, iha mós kompeténsia hodi promove direitu ba kultura no ba fruisaun kulturál, nomós promosaun, difuzaun no valorizasaun patrimóniu kulturál Timor-Leste, ba nivel nasionál no internasionál.

Jornalista : Arminda Fonseca

Editór       : Florencio Miranda Ximenes