DILI, 14 dezembru 2022 (TATOLI)— Governu liuhosi reuniaun Konsellu Ministru (KM), kuarta ne’e, aprova projetu rezolusaun ba nomeasaun membru Konsellu Jerál Universidade Nasionál Timor Lorosa’e (UNTL), ne’ebé aprezenta hosi Ministériu Ensinu Superiór, Siénsia no Kultura (MSSK), Longuinhos dos Santos.
“Konsellu Ministru deside hodi nomea Ministru Edukasaun, Juventude no Desportu, Armindo Maia, ninia lejítimu reprezentante, hanesan membru Konsellu Jerál UNTL nian reprezenta Governu. Nia mós nomea hanesan membru Konsellu Jerál UNTL hodi hamutuk ho Padre Acácio Domingos de Castro, Dr. José António Gusmão Guterres no João Baptista Fernando Alves, hanesan Prezidente Konsellu Jerál UNTL”, hateten Ministru Prezidensia Konsellu Ministru, Fidelis Manuel Leite Mangalhães, hafoin reuniaun iha Palasiu Governu-Dili.
Membru Konsellu jerál UNTL na’in haat ne’e hili entre ema na’in 15 ne’ebé forma ona órgaun konsultivu universidade públika ne’e rasik.
Bazea ba artigu 19º Konsellu Jerál iha nia kompozisaun no funsionamentu; 1) nu’udar orgaun deliberativu másimu iha universidade, aprova polítika, planu no regulamentu sira. 2) kompostu membru 15 no ezerse responsabilidade kona-ba planu estratéjiku sira, uza prioridade, dezenvolvimentu fasilidade sira, finansiamentu no jestaun rekursu nomós rekursu umanu.
Nune’e iha parte 3) Integra Konsellu Jerál. 4) Membru governu responsável husi ensinu superiór. a. Membru governu responsável husi finansa estadu nian ka reprezentante lejítima, sein direitu ba votu. b. Membru governu ida nomea husi Konsellu Ministru ka reprezentante lejítimu, iha direitu ba votu.
Parte c. Reitór UNTL nian ne´e profesór ida ka investigadór ho grau doutoradu, reprezenta husi fakuldade hitu (7) maka universidade. d. Entidade ne’ebé reprezentativa husi estudante sira. e. Membru sira ne’ebé referidu iha aliña e no f, eskolla iha númeru anteriór husi Konsellu Ministru nu’udar Konsellu Jerál sesante.
Hatutan iha f. Prezidente Konsellu Jerál nomeadu husi Konsellu Ministru; Reitór husi personalidade nain tolu rekoñesidu hanesan méritu referidu iha aliña g. Konsellu Jerál reúne ordinariamente dala ida kada trimester no ekstraordinariamente sempre konvoka husi Prezidente rasik. h. Mandatu Konsellu Jerál nian dura tinan lima hafoin renovável dala-ida.
Jornalista : Arminda Fonseca
Editór : Florencio Miranda Ximenes
