DILI,14 dezembru 2022 (TATOLI)— Diretór Ezekutivu Fundasaun Klibur Domin Tibar, Joaquin Freitas, hateten janeiru to’o setembru rejista pasiente tuberkuloze na’in-192 hosi munisípiu Viqueque, Baucau, Liquiça no Dili.
“Ita halo atividade detektasaun ba kazu tuberkoluze ne’e iha munisípiu haat hanesan Viqueque, Baucau,Liquiça Díli,(Atauro no Metinaro). Nune’e atividade ida ne’e ita nafatin hala’o iha komunidade le’et atu rekolla amostra no halo teste, hafoin hasai raiu-x no deteta pasiente halo tratamentu imediata”, Diretór Ezekutivu Fundasaun Klibur Domin Tibar Joaquin Freitas dehan ba TATOLI via telefonika ohin.
Husi atividade refere, iha trismetre datoluk detekta kazu 192 iha munisípiu haat, hosi númeru ne’e kazu 112 husi munisípiu viqueque no Liquiça no kazu 80 husi Baucau no Atauro.
Atividade ida ne’e, Klinika Klibur Domin hala’o tanba servisu hamutuk ho IOM no KOICA ne’ebé komesa monta laboratoriu teste TB iha Atauro ho kompleta makina raiu-x ida no makina Gene-Xpert hodi fasilita deteksaun kazu ne’e ho lalais iha komunidade nia-le’et.
“Bainhira ita detekta kazu mak ho kondisaun di’ak halo kedan tratamentu, maibé ho kondisaun grave ita halo transferensia mai nasionál hodi halo tratamentu iha Klibur Domin Tibar”, nia afirma.
Daudaun ne’e, pasiente ne’ebé mak baixa iha klinika refere na’in-20 resin .
Jornalista : Felicidade Ximenes
Editór : Florencio Miranda Ximenes
