ANC ho entidade relevante diskute dezenvolvimentu telekomunikasaun iha TL
DILI, 15 dezembru 2022 (TATOLI)— Autoridade Nasionál Komunikasaun Timor-Leste (ANC-TL) ho entidade relevante sira, kinta ne’e, realiza semináriu kona-bá Teknolíjia Informasaun no Komunikasaun (ICT, sigla inglés) no dezenvolvimentu telekomunikasaun iha Timor-Leste.
ANC mak orgaun reguladora ba setór telekomunikasaun hanesan haktuir iha artigu 4 númeru 2 iha Dekretu-Lei 15/2012. ANC ho nia papél atu atribui kompeténsia sira hanesan regulamentasaun, supevizasaun no sansaun sira, reprezenta Governu ka Estadu iha plataforma rejional nasionál no internasionál setór telekomunikasaun.
“Semináriu ne’e sai hanesan enkontru hodi hanoin lisuk ba dezafiu no solusaun no rekomedasaun sira iha ne’ebé sira bele tulun ita nia instituisaun iha servisu lorloron nian atu hadi’a liutan kualidade servisu nian hodi kontribui no efetivu liutan iha ita-nia rai, maske ita hosoru dezafiu,” hatete Prezidente ANC, João de Oliveira Freitas, hafoin semonáriu iha Dili, kinta ne’e.
ANC mai ho atribuisaun no kompeténsia sira ho objetivu ida de’it mak atu kontribui ba dezenvolvimentu nasionál no moris di’ak ba timoroan nian.
“Dezenvolvimentu nasionál no moris di’ak sira ne’e bele sente ho di’ak bainhira setór telekomunikasaun mós dezenvolvidu ho di’ak, tanba servisu telekomunikasaun nian hanesan asesu telefónika, servisu dadus ka intenet asesivel hosi timor-oan hotu ho folin ne’ebé mak baratu kualidade nomós hetan atendimentu ne’ebé mak di’ak no lais,” nia dehan.
Nune’e, nia rekoñese ba área dezenvolvimentu telekomunikasaun nian ANC nafatin presiza apoiu no kolaborasaun fíziku hosi parseiru hotu hanesan akademia sira, operadór telekomunikasaun sira, Tane Konsumidór inklui Asosiasaun Informasaun Komunikasaun no Teknolójia Timor-Leste (ICT-TL, sigla portugés).
“Nune’e, Ita involve instituisaun relevante sira liuliu operadór telekomunikasaun hodi rona hosi sira-nia hanoin kona-ba susesu no dezafiu-sira atu bele dezenvolve di’ak liutan fornesimentu telekomunikasaun no atendimentu ba públiku”, katak nia.
Iha fatin hanesan, Koordenadór Gabinete Protesaun Konsumidór, Nazario Jerónimo, hateten semináriu ne’e atu ko’alia kona-ba área telekomunikasaun nian tanba durante tinan 20 hetan independénsia kosentra liuba asuntu polítiku kompara ho ICT.
“Ita hotu hatene área telekomunikasaun ne’e importante ba era globalizasaun, ida ne’e mós ajuda dezenvolvimentu nasaun nian”, nia afirma.
Jornalista : Arminda Fonseca
Editór : Florencio Miranda Ximenes
