GPE prodús livru millaun 2-resin ba estudante EPE-EB iha territóriu nasionál
DILI, 15 dezembru 2022 (TATOLI) – Global Partnership for Education liuhosi apoiu subsídiu finansiamentu aseleradu ba COVID-19 ho totál osan rihun $840 konsege halo ona produsaun livru hamutuk millaun 2 resin atu distribui ba labarik sira iha eskola edukasaun Pre-eskolár no edukasaun ensinu báziku primeiru no segundu siklu iha territóriu nasionál.
Liuhosi Ajénsia internasionál UNICEF ne’ebé parseiria ho Ministériu Edukasaun, Juventude no Desportu (MEJD) realiza ona serimónia entrega ona livru millaun 2 resin ne’e ba Ministru Edukasaun Armindo Maia, atu iha futuru bele distribui ba estudante sira iha eskola edukasaun pre-eskolár no edukasaun ensinu báziku primeiru no segundu siklu iha territóriu nasionál.
Reprezentante UNICEF iha Timor-Leste, Bilal Aurang Zeb Durrani, haktuir livru kuaze millaun 2 resin ne’ebé UNICEF entrega ona ba MEJD ne’e imprime ho ámbitu subsídiu finansiamentu aseleradu GPE ba COVID-19 nian.
Nia fiar katak livru sira ho volume impresaun boot mak MEJD simu iha parselá únika.
“Livru sira+ne’ebé GPE emprimi no ohin UNICEF entrega ona ba MEJD ne’e kompostu hosi livru istória, livru ba atividade, livru ezersísiu ba labarik pre-eskolár sira to’o labarik sira sestu anu ensinu báziku segundu siklu, inklui mós giaun ba profesór hodi apoia melloramentu sira-nia koñesimentu jerál no bele uza hanesan instrumentu hosi hanorin no hadi’ak aprendizajen ba labarik sira,” Reprezentante UNICEF ne’e iha serimónia entrega livru ne’ebé hala’o iha armájen MEJD, Ariana, Bairru-Pité, kinta ne’e.
Livru sira ne’e sei distribui ba estudante EPE-EB sira hotu iha territóriu nasionál ho intensaun atu fó oportunidade ba sira atu lee no aprende.
“Ita hotu hatene katak tinan tolu liu ba labarik sira-nia aprendizajen iha Timor-Leste inklui labarik sira iha mundu afetadu maka’as relasiona ho COVID-19, sira-nia nota aprendizajen sira ki’ik antes kedas. Estudu sira-ne’ebé hala’o durante tinan tua liu ba hatudu katak estudante sira-nia nota aprendizajen tún hanesan rezultadu hosi enseramentu eskola sira tanba pandemia COVID-19,” nia tenik.
Reprezentante UNICEF Bilal konsidera edukasaun ne’e importante duni ba labarik sira no tenke aselera esforsu sira hodi hasoru krize aprendizajen liuhosi foku ba alfabetizasaun no numerasaun fundamentál iha tinan dahuluk sira.
“Apela ba líder eskola sira, profesór sira no inan aman sira atu utiliza rekursu sira hosi apoiu melloramentu abilidade alfabetizasaun. Tanba ministériu edukasaun dezenvolve ona matadalan ba eskola sira kona-ba forma di’ak ida atu armazena livru sira-ne’e ho didi’ak no seguru, maibé importante liu maka oinsá atu uza hodi promove hadomi lee hodi halo livre sira-ne’e asesivel ba estudante sira liu hosi dezenvolvimentu kultura lee nian,” nia fó hanoin.
Jornalista: Tomé Amado
Editór: Evaristo Soares Martins
