Kompañia GARENEZ finaliza reabilitasaun fatin konsulta saúde iha Vera-Cruz
DILI,15 dezembru 2022 (TATOLI)— Kompaña Gaerenez Unip, Lda entrega ona reabilitasaun fatin konsulta saúde ambulatóriu ba Servisu Saúde Munisípiu Dili.
Konstrusaun ne’e hahú iha loron 21 outubru 2022 no ramata iha loron 15 dezembru 2022. Orsamaentu ne’e hetan apoiu hosi Ministériu Administrasaun Estatál (MAE) ho montante $30,200.85.
“Ami kompleta ona obra ne’e durante fulan ida nian laran no ohin ami entrega ba Servisu Saúde Munisípiu Dili hodi profisionál saúde sira atu utiliza didi’ak hodi fó tratamentu saúde ba ita nia pasiente sira”, Kompañia Gaerenez Unip Lda, Delia de Jesus, hateten iha nia diskursu bainhira entrega fatin refere ba SSM Dili iha sentru saúde Vera-Cruz, sesta ne’e.
Iha biban hanesan, Diretora Servisu Saúde Munisípiu Dili, Agostinha Segurado, dehan empreza entrega ona uma ida ne’e atu sai fatin konsulta ambulatóriu ba komunidade sira iha Vera-Cruz nomós ba fatin seluk ne’ebé mak hakarak atu mai halo tratamentu iha ne’e.
“Ami agradese tanba bele haforsa ona ami nia kbiit hodi uza ba halo tratamentu ba pasiente sira”, katak.
Servisu Saúde Munisípiu Dili halo esforsu atu tau mós atensaun ba sentru saúde Formoza, Becora no Comoro.
Entertantu, Diretór Jerál Dezenvolvimentu Rurál husi MAE, Rosito Guterres, hatete saúde ne’e importante tebes ba ema nia moris, tanba ne’e mak apoiu Servisu Saúde Munisipiu Dili ho fundu ne’ebé natoon hodi halo reabilitasaun ba fatin ambulatóriu iha sentru saúde Vera-Cruz atu profisionál saúde uza hodi halo tratamentu ba pasiente sira.
Jornalista : Felicidade Ximenes
Editór : Florencio Miranda Ximenes
