Ministru Armindo apela ba dirijente eskola sira labele rai de’it livru iha armazein eskola
DILI, 15 dezembru 2022 (TATOLI) – Ministru Edukasaun, Juventude no Desportu (MEJD), Armindo Maia, apela ba dirijente eskola sira iha edukasaun pre-eskolár no ensinu báziku primeiru no segundu siklu iha territóriu nasionál atu labele rai de’it livru ne’ebé ajénsia dezenvolvimentu sira apoiu ona ba eskola sira iha armazein eskola nian maibé tenke distribui ba estudante sira hodi bele utiliza iha prosesu ensinu aprendizajen.
“Ha’u husu ba dirijente ministériu edukasaun nian bainhira halo distribuisaun livru ba eskola sira tenke apela ba mestre sira no diretór eskola sira atu livru sira ne’e tenke fó ba alunu sira hodi lee. Karik alunu sira lori ba uma di’akliu, importante maka hateten ba alunu sira tenke kuidadu. Maibé labele rai fali iha armazein hanesan osan mean ida,” Ministru Armindo ba jornalista sira hafoin remata serimónia simu livru millaun 2 resin hosi UNICEF iha armazein Bairru-Pité, kinta ne’e
Tanba dala barak ona akontese iha eskola sira livru ne’ebé Ministériu Edukasaun distribui ba eskola sira barak maka rai de’it iha armazein eskola nian depois sai lahuk hotu.
“Livru millaun 2 resin ne’e konsidera barak duni, bainhira ita kompara ho númeru estudante kuaze rihun 400 ne’e kada estudante ida bele hetan livru lima, ha’u hein katak estudante sira bele uza livru sira ne’e ho didi’ak durante iha nível Pre-eskolár mai to’o ensinu báziku,” nia tenik.
Livru sira ne’ebé MEJD hetan hosi parseiru dezenvolvimentu sira ne’e tanba preokupasaun hosi ajénsia sira nian ne’ebé hakarak edukasaun iha Timor Leste atu hetan avansu liután iha futuru.
“Ita hotu hatene katak ita-nia taxa alfabetizmu mós sei aas. Ita-nia presentajen labarik sira-ne’ebé ho idade ki’ik loloos asesu ona ba edukasaun pre-eskolár,” nia hateten.
Jornalista: Tomé Amado
Editór: Evaristo Soares Martins
