HEADLINE, SEGURANSA

PNTL garante situasaun la’o hakmatek iha selebrasaun Natál no Tinan Foun

PNTL garante situasaun la’o hakmatek iha selebrasaun Natál no Tinan Foun

Komandante Komandu Operasionál Nasionál (KKON), Superintendente Xefe Pedro Belo. Imajen/Eugénio Pereira

DILI, 16 dezembru 2022 (TATOLI)— Polisia Nasionál Timor-Leste (PNTL), hahú prepara nia-membru sira atu hala’o seguransa iha territóriu nasionál iha ámbitu selebrasaun Natál no Tinan Foun, hodi sidadaun hotu selebra loron importante ne’e ho hakmatek.

Komandante Operasaun Nasionál PNTL, Superintendente Xefe Polisia Pedro Belo, hateten komandu PNTL hala’o enkontru koordenasaun serbisu liuliu define planu operasaun iha Natál no Tinan Foun.

“Ita bo’ot sira hatene ita sei iha eventu importante rua ida maka konsertu muzikál Jamrud ne’ebé sei hala’o iha Tasi-Tolu, iha tersa semana oin, ne’ebé envolve mós arista nasionál balun. eventu seluk maka selebrasaun Natál no Tinan Foun. Maibé ami garante katak atividade sira ne’e hotu sei lao di’ak to’o ramata”, Pedro Belo hatete ba jornalista sira hafoin enkontru ho Komisáriu Faustino da Costa iha Kuartél Jerál PNTL, Caicoli, sesta ne’e.

Atu garante situasaun la’o hakmatek, Komandante ne’e husu Komandu PNTL munisípiu sira hotu atu fó seguransa másimu liuhosi hala’o operasaun no kontrolu ba fugete sira hodi ema labele sunu arbiru, nune’e bele kria hakmetek iha komunidade nia le’et.

PNTL mós sei garante konsertu muzikál hosi Artista Jamrud hosi Indonézia ne’ebé sei hala’o iha Tasi-Tolu, iha loron 20 dezembru ne’e sei la’o di’ak.

“Ami garante konsertu ne’e sei la’o di’ak no ema hotu ne’ebé partisipa iha atividade ne’e sei fila ho di’ak”, nia afirma.

Jornalista: Natalino Costa

Editór     : Florencio Miranda Ximenes

iklan
iklan

Leave a Reply

iklan
error: Content is protected !!