DILI, 16 dezembru 2022 (TATOLI)—Governu Timor-Leste no Estadu Unidu Amérika (EUA) liuhosi Millennium Challenge Corporation (MCC), sesta ne’e, asina akordu Programme Implementation Agreement (PIA) ba implementasaun akordu kompaktu.
“Ha’u hanesan reprezentante prinsipál no hosi parte Estadu Unidu Amérika reprezenta hosi Vise-Prezidente MCC nian foin asina dokumentu ida hanaran PIA,” Ministru Prezidénsia Konsellu Ministru, Fidelis Manuel Leite Mangalhães, hateten, iha Palásiu Governu.
Tuir Ministru, inisiativa ne’e nu’udar pasu importante hodi hahú implementasaun akordu kompaktu MCC tanba hanesan kontinuasaun kompaktu ne’ebé aprovadu ona hosi Governu no Parlamentu Nasionál ratifika ona.
Aleinde ne’e, akordu ne’e hatuur detalla sira iha projetu ne’ebé sei dezenvolve iha ámbitu kompaktu, nune’e marka prontidaun Estadu rua tama iha faze implementasaun.
“Ita sei implementa projetu ne’ebé tama akordu kompaktu ho MCC hanesan programa edukasaun, bee no saneamentu, drenajen inklui abastesimentu ho montante globál millaun $484, ne’ebé asina ona iha fulan-jullu liubá. Kooperasaun ne’e sei la’o durante tinan-lima,” governante ne’e akresenta.
Notísia relevante: PN ratifika akordu kompaktu MCC
Komponente bee, saneamentu no drenajen ho objetivu atu hamenus kontaminasaun bee-moos no bee rai-okos ne’ebé bele fó moras, impede moris di’ak no saúde ba labarik no adultu sira.
Projetu ne’e inklui konstrusaun fábrika ida hodi halo produsaun dezinfetante kímiku ba abastesimentu bee iha sidade, konstrusaun ba sistema sentrál dahuluk bee reziduál, hadi’a rede drenajen ba kapitál Dili no ba munisípiu viziñu haat, reforma polítika no institusionál sira nune’e mós mudansa sosiál no komportamentu hodi hadi’a sistema saneamentu báziku no jestaun bee iha nível doméstiku.
“Projetu bee saneamentu no drenajen, aleinde iha impaktu diretu ba sidadaun sira-nia saúde, buka mós atu hamenus risku inundasaun iha tinan ikus, evita impaktu ambientál no sósiu ekonómiku liuhosi asegura jestaun ba bee no saneamentu sustentável,” nia tenik.
Nune’e mós, komponente edukasaun ho objetivu atu hadi’a kualidade ensinu sekundáriu no lideransa eskolár iha munisípiu hotu.
Projetu ne’e sei estabelese instituisaun formál no sertifikasaun formasaun dahuluk ba formasaun profesór sira hanaran Sentru Exelente, ne’ebé sei fó formasaun no sertifikasaun profisionál ba profesór no líder ensinu sekundáriu iha tempu ohin loron no aban.
“Kona-ba investe iha formasaun ba profesór sira, sei prodús eskola sekundária sira ne’ebé liu, ho alunu sira ne’ebé iha preparasaun di’ak ba merkadu serbisu ka ba edukasaun pós-sekundária nune’e aumenta kapasidade hodi kontribui ba kreximentu ekonómiku país,” Fidelis dehan.
Pasu tuir mai mak atu halo instalasaun ba Institutu Públiku Millennium Challenge Account-Timor-Leste, ne’ebé Governu aprova ona iha sorumutuk Konsellu Ministru iha loron 23 novembru 2022.
Institutu públiku ne’e sei funsiona hanesan instrumentu implementasaun finansiamentu ne’ebé sei hetan doasaun hosi ajénsia governametál MCC no sai hanesan responsável ba jestaun finansiamentu no koordenasaun implementasaun ne’ebé atu promove liuhosi entidade nasionál sira.
Implementasaun projetu sira ne’e sai hanesan responsabilidade Governu liuhosi entidade nasionál sira tuir ida-idak nia kompeténsia.
Jornalista : Arminda Fonseca
Editora : Julia Chatarina
