I Learn Bookstore ho Kios Matenek promove kultura le’e
DILI, 18 dezembru 2022 (TATOLI)–Grupu I Learn Bookstore hamutuk ho Kios Matenek, realiza feira livru durante loron 2 hahú loron 17 to’o 18 fulan-dezembru 2022 hodi promove kultura le’e ihaTimor-Leste.
Membru Grupu I Learn Bookstore, Gerson Filipe Ximenes, hateten feira livru ne’e atu kontinua promove kultura le’e ba Timor-oan hotu-hotu.
“Ami hosi i learn bookstore ne’e livraria online ida, livru sira ne’e ami rai iha uma de’it ami post liuhosi sosiál mídia hanesan facebook, instragram no whatsapp, kliente ruma presiza order mak ami liga ba sira, entaun ami halo parseria ho Kios Matenek halo feira ida ne’e atu ita-nia kliente sira ne’ebé durante buka livru ne’e bele mai sosa ho folin baratu,”Gerson Filipe Ximenes, informa ba Agência Tatoli, iha Manleuana Dili, domingu ne’e.
Nia dehan livru sira ne’ebé Grupu I Learn Bookstore faan iha feira livru ne’e, antes ne’e, hetan doasaun hosi Gramedia Indonézia . Livru hirak ne’e ho titlu oioin, balun ko’alia kona-ba domin, motivasaun moris, novela, negósiu, medisina no seluk tan.
“Livru hirak ne’e ho folin hahú hosi $2,00 to’o $15,00, liuhosi feira ida ne’e ami hakarak hatun nia folin atu ita-nia maluk sira ne’ebé durante ne’e presiza livru bele mai sosa ho folin baratu,” nia dehan.
Jornalista: Arminda Fonseca
Editór: Agapito dos Santos
