Komunidade Bahamori agradese Governu fahe subsídiu $200
DILI, 18 dezembru 2022 (TATOLI)-Komunidade suku Bahamori, postu administrativu Venilale, munisípiu Baucau, fó agradese ba Governu Konstituisaun da-ualu, tanba fahe ona subsídiu (fim do ano) ho valór $200 ba uma-kain sira iha territóriu Timor-Leste.
“Ha’u agradese tebes ba Governu, tanba bele iha hanoin di’ak hodi fahe subsidiu $200 ba kada uma-kain iha fim do ano nian, ida ne’e ajuda ami-nia nesesidade uma laran nian, iha loron boot natal no tinan foun ne’e,” Domingos da Silva, hateten liuhosi nota imprensa ne’ebé Tatoli, asesu.
Iha biban seluk, komunidade Luciano Cipriano, observa katak polítika Governu ne’e di’ak tebes tanba bele tulun komunidade hodi responde nesesidade bázika uma-laran nian.
“Nu’udar komunidade agradese tebes ba Governu tanba ita ukun an tinan naruk foin Governu ida ne’e mak iha polítika fahe subsídiu $200 iha fim do ano, espera Governu mai tan ne’e halo nafatin hanesan ne’e tanba polítika ida ne’e ajuda tebes ami-nia nesesidade uma laran nian,”nia dehan.
Entertantu, suku Bahamori iha uma-kain 618 ho totál populasaun hamutuk 2.859 ne’ebé hela iha aldeia Neo-Ho’o, Cae Male Ho’o, Lia-Oli, Uai-Toqui, Cumo-Oli no Lacu-Uma.
Jornalista: Arminda Fonseca
Editór : Agapito dos Santos
